Гандбол: Тошкентда Марказий Осиё чемпионати ғолиблари аниқланди
Пойтахтимиздаги “Олимпия шаҳарчаси” мажмуасида гандбол бўйича аёллар ва эркаклар жамоалари ўртасида ўтказилган Марказий Осиё чемпионатининг ғолиб ва совриндорлари аниқланди.
Бир ҳафта давом этган муросасиз баҳсларда Ўзбекистон жамоалари билан бир қаторда Қозоғистон ва Ҳиндистон гандболчилари ўз омадини синовдан ўтказди.
Чемпионатнинг эркаклар ўртасидаги ўйинлар сарҳисобига кўра, финалда Қозоғистоннинг “Астана” ва мамлакатимизнинг “UZBEKISTAN TEAM” жамоалари рўбарў келди.
Қизиқарли ва муросасиз кечган баҳсда мамлакатимиз гандболчилари қўшни давлат вакилларини 32:27 ҳисобида мағлуб этди ва Марказий Осиё чемпионига айланди. 3-ўрин учун ўтказилган тўқнашувда Қозоғистоннинг “TURAN” вакиллари мамлакатимизнинг "OKMK" жамоасидан 29:22 кўринишида устун келиб, бронза медалларини қўлга киритди.
Чемпионатнинг хотин-қизлар жамоалари мусобақасида ғолиблик “ОКМК” гандболчи қизлари жамоасига насиб этди. Олмалиқ кон металлургия клубига қарашли жамоа Хоразмнинг "MA’MUN" гандболчиларини 29:28 ҳисобида енгди ва ғолиблик шоҳсупасига кўтарилди.
Ўз навбатида 2-ўрин "MA’MUN", 3-ўрин эса Сурхондарёнинг "Ter DU" жамоасини 34:33 кўринишида енгган Қозоғистоннинг “SHYMKENT” жамоасига тегишли бўлди.
Т.Рўзиев, ЎзА
