Футзал: Олий лига 11-тур ўйинлари бошланмоқда
Бугун, 19 апрель куни Қарши шаҳридаги "Геолог" спорт мажмуасида футзал бўйича Ўзбекистон XXIX миллий чемпионати — Олий лига 11-тур ўйинларига старт берилади.
Кунинг иккинчи ярмида ўтказиладиган 11-турнинг биринчи кунги мусобақаларида Фарғонанинг "Нефтчи" жамоаси Тошкент вилоятининг ОКМК футзал жамоасига қарши майдонга тушади.
Шунингдек, дастлабки кунги футзал баҳсларида Навоийнинг "Қизилқум" жамоаси Жиззахнинг "BMB PFC" жамоаси билан, пойтахтнинг "Локомотив" футзалчилари Термизнинг "Сурхон" жамоаси билан рўбарў келади.
Айтиш лозим, футзал бўйича мамлакат миллий чемпионати — Олий лига баҳслари ўзининг ҳал қилувчи палласига тобора яқинлашмоқда. 11-турда мухлислар кўплаб қизиқарли ва унутилмас воқеликларга гувоҳ бўлиши кутилмоқда. Катта эҳтимол билан ушбу турда XXIX миллий чемпионатининг мингинчи голига мухлислар гувоҳ бўлиши эҳтимоли юқори.
Шунингдек, мамлакат чемпиони номи ҳам мазкур турда муддатидан олдин аниқланиши мумкинлигини назарда тутсак, энг қайноқ лаҳзалар, шиддатли курашлар айнан шу турда юз бериши ҳақиқатга яқиндек, назаримизда.
Яна бир эътиборли жиҳат, 11-тур ўйинларини Ўзбекистон миллий терма жамоаси бош мураббийи Хосе Мария Мендес бевосита Қаршида кузатиб бориши миллий терма жамоага янги истеъдодларни танлаш имконини тақдим этади.
Т.Рўзиев, ЎзА
