Фармацевтика: ЮНИСЕФ билан янги стратегик қадамлар
Тиббиёт ва фармацевтика тармоғини ривожлантириш агентлигида БМТ Болалар жамғармасининг (ЮНИСЕФ) Афғонистондаги ваколатхонаси раҳбарияти ва маҳаллий дорисозлик корхоналари вакиллари иштирокида муҳим музокаралар бўлиб ўтди. Мазкур учрашувда Агентлик директори Абдулла Азизов, ЮНИСЕФнинг Афғонистондаги вакили Тажуддин Ойевале ва ташкилотнинг юртимиздаги вакили ўринбосари Жеффри Ижумба қатнашди.
Мулоқот чоғида мамлакатимизда ишлаб чиқарилаётган фармацевтика маҳсулотларини халқаро харидлар платформаларига фаол жалб қилиш, уларнинг сифат кўрсаткичларини жаҳон стандартларига тўлиқ мослаштириш ҳамда минтақавий шериклик кўламини янада кенгайтириш каби долзарб масалалар муҳокама марказида бўлди. Томонлар дори воситаларини харид қилишнинг шаффоф тартиб-қоидалари, тендер босқичлари, ўзаро шартнома механизмлари ҳамда Афғонистондаги фармацевтика харидларини маҳаллийлаштириш имкониятлари юзасидан батафсил фикр алмашди.
Тадбирнинг амалий қисмида меҳмонлар Тошкент вилоятида барпо этилаётган «BioPharma City» махсус фармацевтика кластери ва Фармацевтика техник университетида олиб борилаётган бунёдкорлик ишлари билан яқиндан танишди. Уларга маҳаллий ишлаб чиқариш инфратузилмасини жадал ривожлантириш, шунингдек, соҳа учун юқори малакали кадрлар тайёрлаш борасида амалга оширилаётган кенг кўламли лойиҳалар ҳақида атрофлича маълумот берилди.
Мазкур учрашув маҳаллий фармацевтика корхоналарининг глобал миқёсдаги харидлар тизимидаги ўрнини мустаҳкамлаш ҳамда ЮНИСЕФ билан ўзаро манфаатли стратегик ҳамкорликнинг янги истиқболли йўналишларини белгилаб олишга хизмат қилади.
Моҳигул Қосимова,
ЎзА
