Эрондаги кескинлик Европа учун янги қочқинлар тўлқинига сабаб бўлиши мумкин
Германия Канцлери Фридрих Мерц Эрондаги вазият янада ёмонлашса, Европа давлатлари янги қочқинлар оқимига дуч келиши мумкинлигини тахмин қилди. Унинг айтишича, ГФР 2015 йил Сурия уруши ортидан юзага келган миграция инқирози такрорланишини истамайди. Шу боис Берлин Эронда барқарорлик сақланиб қолишига жиддий аҳамият қаратмоқда.
Мерц Мюнхенда ўтказилган матбуот анжуманида Эрон аҳолиси 90 миллиондан зиёд эканини таъкидлаб, мамлакатдаги беқарорлик кучли иммиграция келтириб чиқариши мумкинлигини айтди. Ҳозирча ҳукумат Европа томон келиши эҳтимоли мавжуд эронлик қочқинлар сонини аниқ баҳолай олмаяпти.
Шунингдек, Канцлер АҚШ ва Исроилни вазиятни барқарорлаштириш учун тезроқ музокара бошлашга чақирди.
2011 йил бошланган Суриядаги фуқаролик уруши кўҳна қитъа томон улкан миграция тўлқинини келтириб чиқарган. 2015 йил жараён энг юқори нуқтасига етиб, ўша йил фақат Германиянинг ўзига тахминан бир миллион қочқинни қабул қилган. Бу ҳолат мамлакат ижтимоий тизимига кучли босим ўтказган.
Ф. Яхшибоева, ЎзА
