Экологик тарбия оламнинг нозиклигини англашга ундайди
22 апрель – Халқаро Она-ер куни
Кичик бир хайрли иш ҳам она табиатни, бутун дунёни қутқариши мумкин. Шу боис олимлар ва экспертлар болаларни табиатнинг ҳақиқий ҳимоячиси бўлишга ундаб келади.
Бугун 22 апрель – Халқаро Она-ер куни. Ушбу кун 2009 йилда БМТ Бош Ассамблеясининг 63-сессиясида Боливия ташаббуси ва 50 дан ортиқ аъзо давлатлар кўмагида расман эълон қилинган.
Ўшандан бери бу сана инсоннинг табиат олдидаги масъулиятининг глобал рамзига айланди. Дарҳақиқат, ер бизга ўз гўзаллигини бахш этмоқда ва унга муносиб жавоб қайтариш ҳам муҳим саналади.
Экологик тарбия оламнинг нозиклигини англашга ундайди. Юртимизда ҳам айни сана муносабати билан замин келажаги, ҳар бир инсоннинг шахсий масъулиятини ҳис қилиш учун тадбирлар ташкил этиб борилмоқда. Ижодий жамоалар иштироки табиатни асраш ғоялари тарғиб қилинади.
Айни сана муносабати билан бугун Тошкент планетарийси экологик маърифат ва фаол ҳаракатлар марказига айланди.
Халқаро молекуляр аллергология маркази ташаббусига кўра «Яшил лойиҳа» лойиҳа институти ва «Macaroon» эрта ривожланиш мактаби ҳамкорлигида Халқаро Она-ер куни доирасида ўтказилаётган акция болалар, ота-оналар, педагоглар ва экология соҳасидаги етакчи экспертларни бирлаштирмоқда.
Тадбирнинг асосий мақсади — таълим ва санъат орқали жамоатчилик онгини ўзгартириш, экологик маданиятни ва сайёрага нисбатан эҳтиёткорона муносабатни шакллантиришдир.
Айни мақсадда меҳмонлар ва эколог-экспертларнинг тантанали чиқишлари, «Яшил лойиҳа» лойиҳа институти экспертларидан экологик викторина ва планетарий экспозициялари негизида болалар учун интерактив сессиялар ташкил этилди.
«Ер учун бир дақиқа» танлови иштирокчиларининг ишларини кўриб чиқиш, якунларни сарҳисоб қилиш ва ғолибларни тақдирлаш маросимлари бўлиб ўтди.
«Dagchiler» кавказ рақслари студияси ва «Macaroon» эрта ривожланиш мактаби тарбияланувчиларининг табиат гўзаллиги ва инсонлар бирлигидан илҳомланган ижодий чиқишлари дастурга алоҳида кўрк бағишлади.
А.РУСТАМОВ, ЎзА
