Экологик экспертиза хулосасини олишда янги тартиб

Давлат экологик экспертизаси хулосасини олиш учун ариза топшириш тартиби ўзгарди. Энди бундай аризаларни юбориш учун алоҳида электрон тизим эмас, Ягона интерактив давлат хизматлари портали — my.gov.uz дан фойдаланилади.

2026 йил 24 сентябрь соат 18:00 дан бошлаб давлат экологик экспертизаси хулосасини олиш бўйича аризалар фақат my.gov.uz орқали қабул қилинади.

Белгиланган тартибга кўра, аризаларни Ягона интерактив давлат хизматлари портали орқали қабул қилиш ва экологик экспертиза хулосаларини электрон шаклда бериш кўзда тутилган.

Янги тизимни ишга туширишдан олдин зарур техник ишлар амалга оширилди. Ягона интерактив давлат хизматлари порталида аризаларни қабул қилиш ҳамда улар бўйича хулосаларни электрон шаклда бериш тест режимида синовдан ўтказилди.

Синов жараёнлари муваффақиятли якунлангани муносабати билан янги тартиб тўлиқ жорий этилмоқда.

Шунингдек, 24 сентябрь соат 18:00 дан бошлаб eco-service.uz сайти орқали давлат экологик экспертизаси хулосасини олиш учун аризаларни қабул қилиш тўхтатилади.

Шундан буён мурожаатлар белгиланган тартибда фақат my.gov.uz портали орқали юборилади.

Янги тартиб экологик экспертиза хизматларини электрон шаклга ўтказиш, ариза топшириш жараёнини ягона давлат хизматлари тизимига интеграция қилиш ва хулосаларни электрон шаклда олиш имконини кенгайтиришга қаратилган.

Муҳайё Тошқораева, ЎзА