ЕЧЛ финалида “Арсенал” ва “ПСЖ” бугун тўқнашади
Европа Чемпионлар лигасининг жорий мавсум финал учрашуви бугун 30 май куни мамлакатимиз вақти билан соат 21:00да Венгрия пойтахти Будапешт шаҳридаги “Пушкаш Арена” стадионида бўлиб ўтади.
Унда Англиянинг “Арсенал” ҳамда Франциянинг “Пари Сен-Жермен” клублари бош соврин учун майдонга чиқади. Финалга қадар ҳар икки жамоа мураккаб ва қизиқарли йўлни босиб ўтди. “Арсенал” умумий гуруҳ босқичини 24 очко билан биринчи ўринда якунлаб, тўғридан-тўғри нимчорак финалга йўлланма олди. Кейинги босқичларда лондонликлар “Байер”, “Спортинг” ва “Атлетико Мадрид” каби кучли рақиблардан устун келиб, ҳал қилувчи баҳсга чиқишни уддалади. “ПСЖ” эса гуруҳ босқичини 14 очко билан 11-ўринда тугатгани учун мусобақани плей-офф босқичидан давом эттирди.
Парижликлар дастлаб “Монако”ни, кейин эса “Челси”, “Ливерпуль” ва “Бавария” жамоаларини мағлуб этиб, финал йўлланмасини қўлга киритди. Дарвоқе, ушбу жамоалар Европа қитъасидаги турли мусобақаларда жами тўққиз маротаба тўқнаш келган. Унда “Арсенал” 4 маротаба ғалаба қозонган бўлса, 2 та ўйинда мағлуб бўлган қолган 3 та учрашув дуранг билан якунланган. Бироқ ўтган йили ўтган сўнгги учрашувда “ПСЖ” 2:1 ҳисобида ғалабани илиб кетган. Шуни таъкидлаб ўтиш жоизки, “Арсенал” учун ушбу финал алоҳида аҳамият касб этади. Лондон клуби узоқ танаффусдан кейин аниқроғи, 2006 йилдан бери илк бора Чемпионлар лигаси финалига чиқишга муваффақ бўлди. “ПСЖ” эса ўтган йилги чемпионлик унвонини сақлаб қолиш учун бугун бор кучи билан ҳаракат қилади.
Гапнинг лўндаси шуки, бугунги финал нафақат Европа клуб футболи мавсумининг энг муҳим ўйини, балки жорий йилнинг энг қизиқарли футбол тўқнашувларидан бири сифатида баҳоланмоқда. Ушбу баҳсдан сўнг эса дунё футбол жамоатчилигининг асосий эътибори АҚШ, Канада ва Мексика мезбонлик қиладиган “Жаҳон чемпионати–2026”га қаратилади.
Жавоҳир Тошхўжаев, ЎзА
