ЕЧЛ: “Атлетико Мадрид” ўз майдонида дуранг ўйнади
Футбол бўйича Европа чемпионлар лигасининг ярим финалидан ўрин олган навбатдаги баҳс ўз якунига етди. Мазкур босқичнинг иккинчи учрашувида “Атлетико Мадрид” ва “Арсенал” ўзаро куч синашди.
Мадрид шаҳрида ўтган ушбу тўқнашувнинг 44-дақиқасида “Арсенал” клуби аъзоси Виктор Дьёкереш пенальтидан гол уриб, ҳисобни очди. Иккинчи бўлимни ҳужумкор бошлаган “Атлетико Мадрид” футболчилари 56-дақиқага келиб ҳисобни тенглаштиришни уддалади. Ушбу вазиятда Хулиан Альварес рақиб дарвозасига белгиланган пенальтини муваффақиятли амалга оширди. Шу тариқа, учрашув 1:1 ҳисобида якунланди.
Дарвоқе, учрашувнинг энг яхши ўйинчиси Антуан Гризман бўлди. Гризман 90 дақиқа ўйнади ва ушбу вақт мобайнида салкам 10 км. масофа югуриб, тўртта зарба йўллади.
Энди эса баҳсдаги голлар муаллифлари ҳақида айрим фактларни эътиборингизга ҳавола этамиз. “Арсенал” жамоаси ҳужумчиси Виктор Дьёкереш Чемпионлар лигаси ярим финалида гол урган биринчи швед футболчисига айланди.
“Атлетико Мадрид” жамоасини мағлубиятдан сақлаб қолган Хулиан Альварес эса мусобақадаги 25-голини киритди. Бу орқали у Жанубий Америкадан чиққан футболчилар орасида 25 та голни қисқа вақтда урган футболчилар қаторига кирди.
Эслатиб ўтамиз, бундан аввалги энг яхши натижа Лионель Мессига тегишли бўлган. Месси 25 та голни 42 та учрашувда урган.
Эслатиб ўтамиз, Европа чемпионлар лигасининг ярим финал жавоб ўйинлари 5-6 май кунлари бўлиб ўтади. Мусобақанинг финали 2026 йил 30 май куни Венгрия пойтахти Будапешт шаҳридаги «Пушкаш Арена» стадионида ўтказилади.
Жавоҳир Тошхўжаев,
ЎзА
