Davrning uyg‘oq qalbi, islohotlarning bosh maslakdoshi
Bugungi tezkor va globallashgan dunyoda matbuot va ommaviy axborot vositalari shunchaki voqea-hodisalarni qayd etuvchi ko‘zgu emas, balki jamiyatning eng uyg‘oq vijdoni, islohotlarning harakatlantiruvchi kuchiga aylandi.
Yangi O‘zbekistonni barpo etish, jamiyatda ochiqlik, oshkoralik va qonun ustuvorligini ta’minlash yo‘lidagi ulug‘vor odimlarda milliy jurnalistikamiz xalqning chinakam ovozi sifatida maydonga chiqmoqda. Davlatimiz rahbari Shavkat Mirziyoyevning soha xodimlariga yo‘llagan samimiy va teran mazmunli qutlovida aynan mana shu jihatlar — so‘z ijodkorlarining islohotlar muvaffaqiyatini ta’minlashdagi beqiyos o‘rni va ularning rahbariyat uchun eng yaqin maslakdosh hamda jonkuyar do‘st ekani alohida e’tirof etildi. Bu yuksak ishonch o‘zbek matbuoti zimmasiga ham tarixiy, ham ma’naviy mas’uliyat yuklaydi.
Bu yilgi kasb bayramining o‘ziga xos alohida shukuh bilan nishonlanishi zamirida milliy matbuotimizning ulug‘vor tarixiy ildizlari yotadi. Milliy o‘zlikni anglash va ma’rifatparvarlik g‘oyalarini kuylagan jadid bobolarimiz tomonidan “Taraqqiy” gazetasi tashkil etilganiga 120 yil hamda yurtimizda ilk bor radioeshittirishlar tajriba tariqasida uzatilganiga 100 yil to‘lishi bugungi taraqqiyot yo‘limiz asriy an’analarning mantiqiy davomi ekanidan dalolatdir.
Bundan o‘n yil oldin “Inson qadri uchun, inson baxti uchun!” degan ezgu g‘oya asosida boshlangan demokratik yangilanishlar sohada tub burilish yasadi. Yaratilgan mustahkam huquqiy asos va berilgan keng imtiyozlar natijasida bugun mediamakonda xususiy sektorning ulushi keskin oshib bormoqda. Raqamlarga murojaat qilsak, mamlakatimizda faoliyat yuritayotgan qariyb 2 ming 700 ta ommaviy axborot vositalarining 67 foizi, noshirlik sub’ektlarining 90 foizdan ortig‘i hamda matbaa korxonalarining 83 foizi aynan nodavlat sektor hissasiga to‘g‘ri kelmoqda. Bu esa axborot sohasini liberallashtirish va sog‘lom raqobatni shakllantirish borasidagi amaliy qadamlarning yaqqol mahsulidir. Shu bilan birga, kitobxonlik madaniyatini oshirish yo‘lidagi sa’y-harakatlar tufayli nashriyotlar quvvati ikki barobar ortib, bir yilda 60 milliondan ziyod kitob chop etilgani jamiyatning intellektual salohiyati yuksalayotganini ko‘rsatadi.
Ammo bugungi davr jurnalistlardan nafaqat tezkorlik, balki yuksak hushyorlik va professionalizmni ham talab etmoqda. Axborot oqimi shiddat bilan ortib, soxta xabarlar va dipfeyk texnologiyalari keng tarqalayotgan tahlikali zamonda manbalarning ishonchliligini tekshirish va faktcheking ko‘nikmalari soha xodimlarining bosh mezoniga aylanishi shart. Bu borada davlat tomonidan yosh avlodning mediasavodxonligini oshirishga jiddiy e’tibor qaratilib, qisqa vaqtda 10 ming yoshni qamrab olgan zamonaviy ta’lim tizimi yaratildi. Shuningdek, yurtimizda ilk bor uch oy davomida 12 mingdan ortiq soha vakillari va yosh ijodkorlarni birlashtirgan Media haftalik tadbirlari ushbu maqsadlarga xizmat qiluvchi muhim platformaga aylandi.
Davlat bundan keyin ham erkin va mas’uliyatli jurnalistikani qo‘llab-quvvatlash, OAV xodimlarining huquqlarini himoya qilish, ularning ijtimoiy ta’minoti va yashash sharoitlarini yaxshilash borasidagi islohotlarni izchil davom ettiradi. Bu jarayonda O‘zbekiston Jurnalistlar uyushmasining ham roli va nufuzini tubdan oshirish, uni ijodkorlarning kasbiy birdamligi va huquqiy himoyasini ta’minlovchi qudratli tuzilmaga aylantirish hayotiy zaruratdir.
Xulosa o‘rnida aytish mumkinki, bugungi o‘zbek jurnalistikasi shunchaki voqealarni bayon qiluvchi kuzatuvchi emas, balki Yangi O‘zbekistonning taqdirini belgilovchi, islohotlarning zafarli odimlarini ta’minlovchi ijtimoiy kuch sifatida namoyon bo‘lmoqda. Prezidentimiz ta’kidlaganidek, milliy matbuotimiz davlat va jamiyat o‘rtasidagi mustahkam ko‘prik vazifasini bajarib, xalqimizni umummilliy manfaatlar atrofida jipslashtiruvchi qudratli ma’naviy kuchdir. Bu qudratli kuch jamiyatimizda so‘z erkinligi, qonun ustuvorligi va ijtimoiy adolatni ta’minlashda eng ishonchli tayanch bo‘lib qolaveradi. Zero, qalami o‘tkir, so‘zi haqqoniy va yuragi Vatan ishqi bilan yonuvchi jonkuyar jurnalistlar bor ekan, mamlakatimizning demokratik yangilanishlar yo‘lidagi odimlari hech qachon ortga qaytmaydi va ko‘zlangan yuksak marralarga albatta erishiladi.
Alouddin G‘afforov, O‘zA
