Дарахтларни кесманг, жаримаси “чақади”
Сурхондарё вилоятининг Қумқўрғон туманида икки туп тут дарахтини ноқонуний кесиб ташлаган фермерга тегишли чора кўрилди.
Ўзбошимчалик ҳамиша инсонга ташвиш олиб келган. Кўп ҳолларда ортиқча харажатга туширган. Мамлакатимизда экологик барқарорликни таъминлашга, она табиатни асраб-авайлашга алоҳида эътибор қаратилаётган ҳозирги пайтда айрим шахслар ўзбошимчалик билан теварак-атрофга жиддий зарар етказаётгани ва қилмиши фош этилгач, қўлланилган жазодан пушаймон чекаётгани ачинарлидир.
Вилоят экология ва иқлим ўзгариши бош бошқармасидан хабар қилишларича, экополиция ходимлари Қумқўрғон туманидаги Халқобод маҳалласи ҳудудида ўтказган тезкор рейд тадбири чоғида теварак-атрофдаги чанг ва зарарли газларни ютиб, ҳавони тозалаб турган икки туп тут дарахтини ўзбошимчалик билан кесиб ташланган ҳолатни аниқлади. Воҳада ёшу-кекса кўчат экиб, яшил ҳудудларни кенгайтиришга ҳисса қўшаётган бир пайтда фермер бу ҳаракати билан яхшигина жарима тўлайдиган бўлди.
Ҳолат юзасидан табиат қўриқчилари фермер хўжалиги раҳбарига нисбатан Ўзбекистон Республикаси Маъмурий жавобгарлик тўғрисидаги кодекснинг 79-моддаси 1-қисми билан тегишли ҳужжат расмийлаштирди. Эндиликда фермер табиатга етказилган зарар учун 17 миллион 510 минг сўм ва икки туп тут дарахтини ғайриқонуний кесгани учун 10 миллион 300 минг сўм жарима тўлайдиган бўлди.
Нилуфар Бозорова, ЎзА
