“Бойсун баҳори”нинг Президент соврини сурхонлик чавандозларга насиб этди
“Бойсун баҳори” халқаро фольклор фестивалининг улоқ-кўпкари мусобақаси якунланди.
Бойсун туманининг Инкобод маҳалласидаги кенг адирликда икки кун давом этган беллашувда Сурхондарё вилояти ва мамлакатимизнинг бошқа ҳудудларидан келган моҳир чавандозлар жамоавий ҳамда яккалик йўналишларда ўз маҳоратларини намойиш этди.
Дўстлик, чаққонлик ва ҳалоллик каби фазилатлар намоён бўлган жамоавий баҳсларда Сурхондарё вилояти чавандозлари ғолибликни қўлга киритиб, Президент соврини – “Chevrolet Cobalt” автомашинаси билан тақдирланди.
Иккинчи ўринни бир бош туя, бир от ва беш дона телевизор билан тақдирланган Тошкент вилояти жамоаси эгаллади.
Учинчи ўрин эса бир бош туя, бир от ва икки бош қўчқор билан мукофотланган Бандихон – Қумқўрғон жамоасига насиб этди.
Шунингдек, яккалик баҳслари ғолибларига ҳам 15 бош туя ҳамда қимматбаҳо совғалар тантанали равишда топширилди.
Холмўмин Маматрайимов,
ЎзА мухбири
