Атом энергетикаси — экологик барқарорликка эришишда стратегик аҳамиятга эга
Тошкент давлат транспорт университетида "Адолат" социал-демократик партияси Тошкент шаҳар кенгаши ташаббуси билан "Атом энергетикасини ривожлантириш истиқболлари" мавзусида давра суҳбати бўлиб ўтди.
Тадбирда таъкидланганидек, бугунги кунда Ўзбекистон иқтисодиёти жадал суръатлар билан ривожланмоқда. Саноат корхоналари, аҳоли сони ва турмуш даражасининг ўсиши электр энергиясига бўлган талабни йилдан-йилга оширмоқда. Ана шу шароитда анъанавий ёқилғи манбаларига қарамликни камайтириш ва экологик тоза энергия ишлаб чиқаришга ўтиш давр талабига айланган.
Давра суҳбати иштирокчилари атом энергетикасининг қатор муҳим афзалликларини — ортиб бораётган электр энергияси эҳтиёжини қоплаш, анъанавий ёқилғиларга қарамликни камайтириш, экологик тоза энергия манбаини шакллантириш имкониятларини алоҳида эътироф этди.
Қайд этилганидек, атом энергетикасини ривожлантириш Ўзбекистоннинг энергетик мустақиллигини мустаҳкамлаш, иқтисодий ўсишни таъминлаш ва экологик барқарорликка эришиш йўлида стратегик аҳамиятга эга қадам ҳисобланади.
Очиқ мулоқот давомида бу борада бир қатор таклиф ва тавсиялар билдирилди. Шунингдек, иштирокчилар томонидан соҳага оид берилган саволларга мутахассислар батафсил жавоб берди.
М.Комилова, ЎзА
