1 минг 160 та ўзбошимчалик билан қурилган бино ва иншоот аниқланган
Қуйи палата мажлисида қурилиш ва уй-жой коммунал хўжалиги вазири Ш.Ҳидоятовнинг “Аҳоли пунктларининг шаҳарсозлик ҳужжатларига шаҳарсозлик фаолияти субъектлари томонидан риоя этилиши устидан давлат архитектура назоратини амалга ошириш борасида олиб борилаётган ишлар тўғрисида”ги парламент сўровига берилган жавоби кўриб чиқилди.
Парламент сўровига берилган жавобда қайд этилганидек, Давлат архитектура назорати департаменти томонидан 2025 йил якунига қадар 640 та, жорий йил ҳолатига 520 та, жами 1 минг 160 та ўзбошимчалик билан қурилган бино ва иншоот аниқланган. Шундан 1 минг 110 та объектга огоҳлантириш хати берилиб, маъмурий жавобгарлик чоралари қўлланган. 118 таси ҳозирги кунда бартараф этилган бўлса, 65 таси бўйича мажбурий буздириш ҳақида судга даъво аризаси киритилган.
Шунингдек, назорат тизимини рақамлаштириш мақсадида вазирлик томонидан “Шаффоф қурилиш” миллий ахборот тизимида ўзбошимчалик билан қурилган бино ва иншоотларни аниқлаш ҳамда бартараф этиш бўйича автоматлаштирилган тизим яратилди. Мазкур тизим Адлия вазирлигининг “Нотариус”, Ички ишлар вазирлигининг “E-ma’muriy ish”, Олий суднинг “Адолат”, Кадастр агентлигининг “UzKad” ахборот тизимлари билан интеграция қилинган. Бунинг натижасида ўзбошимчалик билан қурилган бино ва иншоотлар ҳақида маълумотлар шаклланади ва ушбу объектларга нисбатан тақиқ қўйилиб, бино ва иншоотларнинг олди-сотдисининг олди олинади.
Вазирлик томонидан ўзбошимчалик билан қурилган бино ва иншоотларни аниқлаш, бартараф этишда жамоатчилик иштирокини самарали ташкил этиш мақсадида “Огоҳ фуқаро” ахборот тизими яратилган бўлиб, у орқали ўзбошимча қурилиш олиб борилаётган ҳолатлар тўғрисида хабар бериш имкони яратилди.
Шунингдек, вилоятларда фаолият кўрсатаётган архитектура ва шаҳарсозлик кенгашлари томонидан 2025 йилда берилган ижобий хулосалардан жами 1 минг 133 та қонунбузилиш ҳолати аниқланган. Йўл қўйилган камчиликлар учун 2 та бошқарма бошлиғи, 2 та бош архитектор, 10 та бўлим бошлиғи, 19 та бош ва битта етакчи мутахассислар билан меҳнат шартномалари бекор қилинган.
Мажлисда мазкур масала юзасидан Қурилиш ва уй-жой коммунал хўжалиги вазирлиги томонидан муайян ишлар олиб борилаётгани қайд этилиб, парламент сўровига жавоб маълумот учун қабул қилинди.
Муҳтарама Комилова,
ЎзА
