V Параосиё ўйинларининг тантанали очилиш маросими ўтказилди

Япониянинг Нагоя шаҳрида V ёзги Параосиё ўйинларининг тантанали очилиш маросими бўлиб ўтди. «Paloma Mizuho» стадионида ташкил этилган тадбирда Япония императори Нарухито иштирокчиларни қутлаб, мусобақани очиқ деб эълон қилди.

Тантанали маросимда 45 та мамлакат делегациялари вакиллари жам бўлди. Ўзбекистон номидан Миллий паралимпия қўмитаси раисининг биринчи ўринбосари Шаҳноза Мирзиёева, Миллий олимпия қўмитаси раисининг биринчи ўринбосари Отабек Умаров, Осиё Паралимпия қўмитаси вице-президенти, Миллий паралимпия қўмитаси раиси Мухторхон Тошхўжаев ва бошқа расмийлар қатнашди.

V ёзги Параосиё ўйинларининг очилиш маросимида Ўзбекистон делегацияси байроғини паратаэквондо бўйича Олимпия чемпиони Асадбек Тоштемиров ва паравелоспорт бўйича жаҳон чемпиони Маржона Пардабоева кўтариб чиқди.

Халқаро майдонда юртимиз шарафини муносиб ҳимоя қилиб келаётган ҳар икки спортчи мамлакатимиз байроғини баланд тутиб, тантанали маросимда Ўзбекистон делегациясини бошлаб борди.

Ўзбекистон терма жамоаси бу йилги қитъа биринчилигида 11 та спорт тури бўйича 149 нафар параспортчи билан иштирок этмоқда. Делегация таркибидан 77 нафар аёл спортчи ўрин олган. Шу жиҳатдан, жамоамиз ўтган “Ханчжоу-2022” Параосиё ўйинларига нисбатан қарийб бир ярим баробар кўп параспортчи билан қатнашмоқда.

Нагоядаги мусобақалар ҳамюртларимиз учун янги йўналишларда ҳам ўз имкониятларини намоён этиш майдони бўлади. Жумладан, ўзбекистонлик спортчилар илк бор пара қиличбозлик, бочча ва пара камондан отиш бўйича баҳсларда иштирок этади.

24 октябрга қадар давом этадиган ўйинлар дастури 18 та спорт турини қамраб олган бўлиб, унда 492 та медаллар жамланмаси учун кураш кечади. Ўзбекистон делегацияси вакиллари ҳам қитъа майдонида муносиб натижалар қайд этиш учун беллашувларга киришади.

Жавоҳир Тошхўжаев,

ЎзА