Трампнинг тинчлик режаси (+видео)
БМТ Хавфсизлик Кенгаши АҚШнинг Ғазо секторида барқарорлик ўрнатиш учун халқаро кучлар тузиш ва Дональд Трамп раҳбарлик қиладиган “Тинчлик Кенгаши”ни ташкил этиш режасини қўллаб-қувватловчи резолюцияни қабул қилди. Россия ва Хитой овоз бермаган, деб хабар тарқатди DW.
Хуллас, Хавфсизлик Кенгашининг 15 аъзосидан 13 нафари Вашингтон таклиф этган резолюцияни қўллаб-қувватлади. Унга кўра, барқарорлик ўрнатиш учун Ғазога халқаро кучлар жойлаштирилади ва Европа Иттифоқи, Буюк Британия ҳамда АҚШ томонидан террористик ташкилот, деб эътироф этилган ҲАМАС ҳаракати қуролсизлантирилади. Шунингдек, вақтинчалик Фаластин маъмурияти тузилиши ҳам кўзда тутилган.
Лекин, Исроил ҳукумати бу резолюцияни танқид қилди. Овоз беришдан олдин Исроил резолюциядаги “Фаластин халқининг ўз тақдирини ўзи белгилаши ва Фаластин давлати тузилиши учун ишончли йўл” ҳақидаги қайдни танқид қилган. Резолюциядаги айрим бандларни Ҳамас ҳам танқид қилган. Уларнинг таъкидлашича, “Ғазо сектори ичида халқаро кучларга вазифа ва мажбуриятлар юкланиши, жумладан қуролсизлантириш режаси, вазиятни мураккаблаштириб юбориши мумкин”. Ҳамаснинг позициясини Reuters агентлиги маълум қилган.
АҚШ етакчиси резолюциянинг қабул қилинишини “ғоятда муҳим овоз бериш” деди. Унинг таъкидлашича, “Тинчлик Кенгаши” тан олинган ва тасдиқланган. “Унга мен раҳбарлик қиламан, таркибига дунёдаги энг нуфузли ва ҳурматли етакчилар киради”, - деб ёзди Трамп ижтимоий тармоқда.
Россия ҳам резолюцияга оид ўз таклифларини тайёрлаган. Бироқ Россия дипломатлари ўз лойиҳаларини овозга қўймаган. Россиянинг БМТ даги доимий вакили қабул қилинган резолюцияни “халтага солинган мушук”ка ўхшатган. Маълум бўлишича, Москва тайёрлаган резолюция лойиҳасида “Тинчлик кенгаши” ва АҚШнинг мувофиқлаштирувчи халқаро кучлари ҳақида гап бўлмаган. Ҳатто, АҚШ президентининг номи ҳам тилга олинмаган.
<iframe width="650" height="420" src="https://www.youtube.com/embed/Cot_Z_oJxXI" title="Trampning tinchlik rejasi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
