Тадбиркор аёллар учун янги имкониятлар

Ўзбекистон Республикаси Камбағалликни қисқартириш ва бандлик вазирлиги ҳамда «Hamroh» хотин-қизлар тадбиркорлигини қўллаб-қувватлаш компанияси ўртасида ҳамкорлик меморандуми имзоланди.

Маълумки, мамлакатимизда хотин-қизлар тадбиркорлигини ривожлантириш ва аёлларнинг иқтисодий фаоллигини ошириш давлат сиёсатининг устувор йўналишларидан бири ҳисобланади. Жумладан, аёллар тадбиркорлиги учун катта миқдордаги имтиёзли кредитлар, кафилликлар, ўқитиш тизимлари ва грантлар ажратилмоқда.

“Hamroh” хотин-қизлар тадбиркорлигини қўллаб-қувватлаш компанияси ҳам хотин-қизларни тадбиркорликка ўқитиш, уларга бизнес хизматларини кўрсатиш, менторлик ва молиявий ёрдам бериш билан шуғулланади.

Тадбирда қайд этилганидек, ҳамкорлик доирасида ҳудудларда хотин-қизларни тадбиркорликка жалб этиш, уларни ўқитиш, маслаҳат билан таъминлаш ва бизнесини ривожлантиришга кўмаклашиш бўйича қўшма дастурлар амалга оширилади.

Шунингдек, меҳнат миграциясидан қайтган хотин-қизлар ҳамда тадбиркорликни бошлаш истагидаги фуқаролар учун тренинг ва консультациялар ташкил этилади. Томонлар қўшма семинар, тренинг ва форумлар ўтказиш, илғор тажриба ва бозор таҳлиллари билан алмашиш ҳамда хотин-қизлар бошчилигидаги бизнесларни тарғиб қилиш бўйича ҳамкорлик қилади.

Гулноза Бобоева,

ЎзА