Қашқадарёда 13,5 мингдан ортиқ фуқаронинг мулкий ҳуқуқи қонуний эътироф этилди
Қашқадарё вилоятида ер муносабатларини тартибга солиш ва фуқароларнинг мулкий ҳуқуқларини қонуний асосда мустаҳкамлаш борасидаги ишлар изчил давом этмоқда. Бу борада қабул қилинаётган қарорлар кўп йиллар давомида ечимини кутаётган масалаларни ҳал этишда муҳим аҳамият касб этмоқда.
Халқ депутатлари Қашқадарё вилояти Кенгашининг навбатдаги сессиясида фуқароларнинг ер участкаларига бўлган ижара ҳуқуқини ҳамда ушбу ерларда қурилган бино ва иншоотларга мулк ҳуқуқини эътироф этиш масаласи кўриб чиқилди.
Сессияда 1 минг 780 нафар фуқаронинг ер ва мулкка бўлган ҳуқуқини қонуний асосда эътироф этиш тўғрисида қарор қабул қилинди.
Натижада вилоятда ўзбошимчалик билан эгаллаб олинган ер участкалари ҳамда уларда қурилган бино-иншоотларга нисбатан мулк ҳуқуқи расман эътироф этилган фуқаролар сони 13 минг 529 нафарга етди.
Мазкур жараён фуқароларнинг мулкий ҳуқуқларини ҳуқуқий жиҳатдан мустаҳкамлаш билан бирга, уларнинг мол-мулкини давлат рўйхатидан ўтказиш, мулкдан эркин фойдаланиш, уни мерос қилиб қолдириш, олди-сотди ёки гаров муносабатларида қонуний иштирок этиши учун мустаҳкам ҳуқуқий асос яратади.
Шунингдек, ушбу ҳуқуқий механизм орқали йиллар давомида турли сабабларга кўра расмийлаштирилмаган уй-жой ва бошқа кўчмас мулк объектлари қонуний мақомга эга бўлмоқда. Бу эса фуқаролар ўртасидаги мулкий, жумладан, мерос билан боғлиқ низоларни камайтириш, тадбиркорлик субъектларининг ҳуқуқий кафолатларини мустаҳкамлаш ҳамда кўчмас мулк муносабатларида шаффофликни таъминлашга хизмат қилмоқда.
Бу каби чора-тадбирлар аҳолининг мулк ҳуқуқини ишончли ҳимоя қилиш, ер муносабатларини тартибга солиш ва қонунийлик тамойилларини таъминлашга қаратилган ислоҳотларнинг амалий натижаси сифатида муҳим аҳамият касб этмоқда.
Ўлмас Баротов, ЎзА мухбири
