Пўлат Усмонов: “Ўзбек жанг санъатини ривожлантириш асосий вазифамиз”
Қадимий қўлёзмалар ва миллий анъаналар замонавий спортга қандай асос бўлган? Миллий спорт турларимиз, хусусан Ўзбек жанг санъатининг жаҳон спорт майдонидаги ўрни ва унинг ноёб жиҳатлари, ривожланиш тенденциялари миллий спорт турларимизнинг изланувчан мутахассисларидан бири, Ўзбек жанг санъати федерацияси раиси Пўлат Усмонов билан суҳбат жараёнида таҳлил этилди.
Асрлар давомида шаклланиб келган миллий ўйинлар, турли яккакураш йўналишлари, қадимий қўлёзмаларда келтирилган маълумотлар халқимизнинг маданий тарихи асрлар билан тенгдошлигидан далолат беради.
Бугун халқаро майдонда самбо номи билан танилган спорт тури миллий курашимиздан андоза олгани, от спортининг поло йўналиши ота-боболаримизнинг қадимий ўйин турларидан бири - чавгондан келиб чиққани, шахматнинг қайсидир элементлари юртимизда пайдо бўлгани ҳеч кимга сир эмас.
Эътиборли жиҳати, мамлакатимиз мустақилликка эришгандан сўнг бир гуруҳ изланувчан олимлар, мутахассислар, жонкуярларнинг саъй-ҳаракати натижасида халқ ўйинлари сифатида қадрланиб келинган миллий ўйинларимиз спорт тури сифатида ўз қаддини тиклади.
Қисқа фурсатда давлатимизнинг қўллаб-қувватлаши натижасида кураш, белбоғли кураш, турон, Ўзбек жанг санъати йўналишлари спорт турига айлантирилди. Уларнинг терминологияси, қонун-қоидаси, спорт либослари яратилди. Техник-тактик усуллар мундарижаси ишлаб чиқилди. Мусобақаларни ўтказиш мезонлари белгиланди. Нафақат мамлакатимизда, халқаро майдонда чемпионатлар, биринчиликлар ташкил этилиши йўлга қўйилди. Халқаро ташкилотлар томонидан эътироф этилишига эришилди.
Энг эътиборлиси, миллий спорт турларимизнинг жаҳон спорт турлари орасида кўпайиши туфайли азалий қадриятларимиз, ота-боболаримизнинг ўлмас меросига янги ҳаёт бағишланди.
Ўзбекистонда хизмат кўрсатган спорт устози, Ўзбек жанг санъати федерацияси раиси Пўлат Усмонов билан суҳбатимиз давомида айни масалалар хусусида сўз юритилди.
Мулоқотимиз жараёнида Ўзбек жанг санъати спорт турининг каратэ, таэквондо, ушу каби яккакурашлардан фарқли жиҳатлари, дунёнинг кўплаб шаҳарларидаги музейларда сақланаётган халқимиз тарихи, яккакураш турларига оид ноёб қўлёзмалар, миллий ўйинларимиз, жанг санъатларимизнинг ўрганилмаган жиҳатлари ҳақида қизиқарли маълумотлар айтиб ўтилди.
Тўлқин Рўзиев,
Нишонбой Абдувоитов (видео), Анвархўжа Аҳмедов (мотнаж),
ЎзА
