Ўзбекистон стартапи Cerberus халқаро майдонда: Сан-Франциско сари йўл
Ўзбекистонлик “Cerberus” стартапининг халқаро танловдаги муваффақияти технология соҳасидаги улкан ғалабадир.
Қайд этиш лозимки, мамлакатимизнинг “Cerberus” стартапи “Road to TechCrunch Startup Battlefield 2026” минтақавий финалида биринчи ўринни эгаллаб, Марказий Евроосиё минтақасидаги энг истиқболли лойиҳалардан бири эканини намоён қилди. Бу ғалаба компанияга 2026 йил 13–15 октябрь кунлари Сан-Францискода бўлиб ўтадиган “TechCrunch Startup Battlefield 200” глобал босқичида иштирок этиш ҳуқуқини берди. “IT Park Uzbekistan” эса шу минтакавий танловнинг ташкилотчиларидан бири, асосий хамкор ҳисобланади.
Маълумотларга кўра, жорий йилги дастурда иштирок этиш учун 39 мамлакатдан жами 726 та ариза келиб тушган. Миллий саралаш босқичлари якунларига кўра, энг истиқболли 22 та стартап минтақавий финалга йўл олди. Ўзбекистон номидан финалда “Cerberus, MoliyAI”, “Sino AI”, “Deepen”, “Fermopolis” ва “Oqim App” каби олтита стартап иштирок этди.
12 август куни ўтказилган минтақавий финал якунига кўра, энг кучли учликдан Ўзбекистоннинг “Cerberus”, Қозоғистоннинг “WeGlobal AI” ва Япониянинг “LOOQ” стартаплари жой олди. Уларнинг барчаси танловнинг глобал босқичига йўлланма олди.
Шу ўринда савол туғилади? Хўш, “Cerberus” аслида нима билан шуғулланади?
“Cerberus” — сунъий интеллектдан фойдаланган ҳолда корпоратив IT тизимлардаги заифликларни автоматик аниқлашга ихтисослашган киберхавфсизлик ечимидир. Стартап сунъий интеллект ёрдамида хавфсизлик текширувларини автоматлаштириш, шунингдек, AI тизимларининг ҳаракатларини белгиланган доирада назорат қилиш имконини берувчи технологияларни ишлаб чиқмоқда.
Лойиҳанинг халқаро инвесторлар эътиборини тортаётгани ҳам бежиз эмас. “Cerberus” 2026 йилда халқаро 500 Global венчур фонди инвестициясини ҳам жалб қилган.
Танловнинг минтақавий босқичидаги кучли учлик учун умумий қиймати 100 минг АҚШ долларига тенг инвестицион мукофот жамғармаси ажратилган. Унга кўра, биринчи ўрин — 50 минг доллар, иккинчи ўрин — 30 минг доллар, учинчи ўрин — 20 минг доллар миқдорида соврин билан мукофотланади.
Инвестициялар “Astana Hub Ventures”, IT Park “Ventures” ва “Silkroad Innovation Hub” томонидан тақдим этилади. Бундан ташқари, OpenAI ҳам худди шу нисбатда — жами 100 минг доллар миқдорида API кредитларини ажратади.
Кучли учлик учун “TechCrunch Startup Battlefield 200” саҳнасида ўз лойиҳаларини тақдим этиш, шунингдек, “TechCrunch Disrupt 2026” кўргазма майдонида уч кун давомида технологияларини намойиш этиш имконияти яратилган.
Ҳар бир жамоанинг икки нафар аъзоси учун Сан-Франциского авиачипта ва бир ҳафтагача яшаш харажатларини қамраб олувчи тўлиқ молиялаштирилган сафар ҳам тақдим этилади.
“Cerberus” учун кейинги босқич янада муҳим. Сан-Францискода стартап жамоаси ўз технологиясини халқаро инвесторлар, венчур фондлари ва дунёдаги йирик технологик ҳамжамият вакилларига тақдим этади.
“Startup Battlefield” эрта босқичдаги истиқболли стартапларни халқаро майдонга олиб чиқиши, инвесторлар эътиборини жалб этиши ва янги бозорларга кириш имкониятини яратиши билан аҳамиятли. “Cerberus’нинг минтақавий финалдаги ғалабаси эса Ўзбекистон стартап экотизими учун навбатдаги муҳим халқаро натижа бўлди. Энг муҳими, ўзбек стартаплари энди нафақат маҳаллий, балки глобал технологик бозорда ҳам ўз имкониятларини намоён этаётганини кўрсатмоқда.
Муҳайё Тошқораева, ЎзА
