Осиё чемпионатида тарихий натижа қайд этган атлетларимиз тантанали кутиб олинди

Жанубий Кореянинг Мокпо шаҳрида енгил атлетиканинг улоқтириш турлари бўйича Осиё чемпионати бўлиб ўтди. Унда Ўзбекистон енгил атлетика терма жамоаси 8 нафар спортчи билан иштирок этиб, якунда 1 тадан олтин ва кумуш медални қўлга киритди.

Тошкент халқаро аэропортида мусобақадан қайтган терма жамоа аъзоларини Ўзбекистон енгил атлетика федерацияси раҳбарияти ҳамда спортчиларнинг яқинлари тантанали тарзда кутиб олди.  

Осиё чемпионатининг эркаклар ўртасида найза улоқтириш баҳсларида Сарвар Исмоилов 77.39 метр натижа қайд этиб, мусобақанинг олтин медалига сазовор бўлди.  

Ҳамюртимиз ушбу натижа орқали шахсий рекордини янгилади ҳамда мамлакат тарихидаги энг яхши 9-натижани кўрсатди. Шунингдек, мазкур ғалаба улоқтириш турлари бўйича Осиё чемпионатлари тарихида Ўзбекистон учун илк олтин медаль сифатида қайд этилди.

Шунингдек, эркаклар ўртасида босқон улоқтириш йўналишида Аюбхон Фаёзов 71.33 метр натижа билан кумуш медални қўлга киритди.

Жавоҳир Тошхўжаев,

ЎзА