Осиё чемпионати ўзбек оғир атлетикасининг янги авлоди камолга етаётганини кўрсатди
Ҳиндистоннинг Гандҳинагар шаҳрида 28 давлатнинг 172 нафар оғир атлетикачиси иштирокида ўтказилган Осиё чемпионати якунланди.
Жорий йилнинг 9 сентябрь-4 октябрь кунлари Япониянинг Аичи-Нагоя шаҳрида ташкил этиладиган XX ёзги Осиё ўйинларига тайёргарликнинг муҳим босқичи саналган қитъа чемпионатининг сўнгги кунида Ўзбекистон терма жамоаси аъзоси Амир Абдуллаев +110 килограмм вазн тоифасидаги баҳсларда қатнашди.
Шиддатли кечган мусобақалар натижасида ҳамюртимиз даст кўтариш баҳсида 189 кг. тошни бўйсундириб, кумуш медални қўлга киритди.
Айтиш лозим, ўтган йили Хитойнинг Жиангшан шаҳрида катталар ўртасида кечган Осиё чемпионати даст кўтариш баҳсида 182 кг. натижа қайд этиб, бронза медалига сазовор бўлган Абдуллаевнинг бу йил кўрсаткичини 7 килограммга яхшилагани Осиё ўйинларига муносиб тайёргарлик кўрсатаётганидан далолат, дейиш мумкин.
Кутилганидек кескин рақобат ва муросасиз беллашувларга бой тарзда поёнига етган чемпионат давомида бир қатор Осиё ҳамда жаҳон рекордлари ўрнатилди.
Қувонарлиси, Жўрабек Зоиров ва Аброр Тожимирзаев мураббийлигидаги Ўзбекистон терма жамоаси чемпионатда 6 нафар спортчи билан қатнашиб, 1 та олтин, 4 та кумуш ва 1 та бронза, жами 6 та медалга сазовор бўлди.
Терма жамоамиз аъзоларидан Сарвар Зафаржонов -88 килограмм оғирликда олтин, Муҳаммадқодир Тоштемиров -94 килограммда 3 та кумуш, -79 кг. вазн тоифасида Абдулазиз Алимжоновнинг бронза ва Амир Абдуллаевнинг +110 килограммда кумуш медалга эга чиққани ўзбек оғир атлетикасида Руслан Нуриддинов ва Акбар Жўраевнинг муносиб издошлари етишиб чиқаётганини яна бир карра намойиш этди.
Т.Рўзиев, ЎзА
