Ona diyorni yashil makonga aylantiraylik: bu — bizning kelajak oldidagi muqaddas burchimiz!
“Yaxshi niyatda ekilgan har bir ko‘chat bu – hayot, bu – toza havo, bu – sog‘lom muhit, bu – kelajak”. Davlatimiz rahbarining ushbu teran mazmunli so‘zlari bugun nafaqat da’vat, balki har bir yurtdoshimiz uchun amaliy hayot dasturiga aylanishi lozim. Zero, tabiatni asrash va yashillik dunyosini kengaytirish – shunchaki ekologik tadbir emas, balki insoniyatning yer yuzidagi umrboqiyligini ta’minlovchi eng oliy mas’uliyatdir.
Xalqimizda “Yaxshidan bog‘ qoladi”, “Bir ko‘chat eksang – ming baraka”, “Farzand ko‘rsang, to‘y qilsang, daraxt ek”, deb bejiz aytilmagan. Davlatimiz rahbari ta’kidlaganidek, bunday hikmatli so‘zlarning ahamiyati hozir har qachongidan ham dolzarb bo‘lib borayotganini barchamiz kundalik hayotda, global iqlim o‘zgarishlari fonida yaqqol his etib turibmiz. Shu bois, “Yashil makon” umummilliy loyihasi doirasida amalga oshirilayotgan ishlarni yanada takomillashtirish, bu tashabbusning nechog‘li ahamiyatliligini targ‘ib etish kechiktirib bo‘lmas vazifadir.
Prezidentimiz mahalla raislari, nuroniy otaxon va onaxonlarimiz, xotin-qizlar vakillari hamda barcha faollarga murojaat qilib, joylarda milliy urf-odatlarimiz va qadriyatlarimizni yanada kengroq targ‘ib qilishga chorladi. Bugun mahalla aholisini hamjihatlik va ahillik ruhida mana shunday ezgu ishlarga safarbar etish, maxsus klublar va jamoalar tashkil qilish vaqti keldi. Har bir ko‘cha, xonadon va yo‘l bo‘ylariga nihollar qadash, qir-adirlarga daraxt va butalar ekishda katta avlod vakillari yoshlarga bosh bo‘lishi, ularga tabiatni sevish va asrash bo‘yicha o‘rnak ko‘rsatishi zarur.
Zero, ekilgan har bir nihol nafaqat havoni tozalaydi, balki ona zaminning “o‘pkasi” bo‘lib xizmat qiladi. Bu jarayonda faqat son emas, balki sifat va doimiy parvarish birinchi o‘ringa chiqishi lozim. Ekilgan har bir niholning taqdiriga befarq bo‘lmaslik, uni voyaga yetkazish uchun jamoatchilik nazoratini kuchaytirish — vatanparvarlikning eng oliy namunasidir.
Xulosa o‘rnida aytish joizki, tabiatga muhabbat Vatanga bo‘lgan muhabbatning bir ko‘rinishidir. Yaxshi niyat bilan yerga qadalgan nihol yillar o‘tib ulkan bog‘larga aylanadi. Bu bog‘lar esa bizning kelajak oldidagi qarzimiz, sog‘lom hayotimiz kafolati va yurtimiz ko‘rki bo‘lib qolaveradi. Keling, yashil olamni birgalikda barpo etaylik — bu bizning farzandlarimiz uchun qoldiradigan eng bebaho merosimiz bo‘lsin!
A.G‘afforov,
O‘zA
