Ҳаммаси назорат остида: Макрон аҳолини тинчлантирди
Президент Эммануэль Макрон Францияда хантавирус билан боғлиқ вазият “назорат остида” эканини маълум қилди ва Европа давлатларини бирдам ҳаракатланишга чақирди. Етакчи Найробида ўтган халқаро саммит якунида сўзлар экан, ҳукумат вирус тарқалишининг олдини олиш учун “тўғри қарорлар” қабул қилганини таъкидлади.
Манба айтишича, Франция ва Испания вирусга қарши Европада “энг қатъий тартиб” жорий қилган. Энди эса минтақа бўйлаб ягона ва қатъий стандарт асосидаги санитария назорати тизими керак.
Франция соғлиқни сақлаш вазири Стефани Рист парламентда чиқиш қилиб, мамлакат ҳудудида Андес вируси кенг тарқалгани ҳақида ҳеч қандай далил йўқлигини билдирди. Шунингдек, касаллик мутацияга учрагани ҳам тасдиқланмаган.
Расмийлар қайд этишича, аниқланган барча мусбат ҳолатлар круиз кемаси йўловчилари билан боғлиқ. Францияда вирусга дахлдор жами 22 киши аниқланган. Уларнинг бари текширувдан ўтказилган ёки шифохонага жойлаштирилмоқда.
Айни пайт Парижда хантавирус юқтирган аёл оғир аҳволда қолган. Бемор сунъий нафас қурилмаси орқали ҳаёт учун курашяпти. Вирус беморнинг ўпкаси ва юраги фаолиятига жиддий зарар етказган.
Эпидемиолог Антуан Флао айни ҳолатни “ноодатий ва мисли кўрилмаган вазият” деб атади. Унинг фикрича, хантавирус одатда тиббий назорат заиф чекка ҳудудларда кузатилади. Бу гал эса вирус халқаро круиз кемасида тарқалгани хавотирни кучайтирмоқда.
Мусулмон Зиё, ЎзА
