Германиянинг нуфузли "ASIIN" агентлиги Қўқон давлат университетининг 4 та таълим дастурини эътироф этди
Қўқон давлат университетида таълим сифатини халқаро стандартлар асосида такомиллаштириш, таълим дастурларининг рақобатбардошлигини ошириш ҳамда халқаро академик ҳамкорликни ривожлантириш борасида амалга оширилаётган ишлар ўзининг навбатдаги муҳим натижасини берди.
Университетнинг кимё ва биология йўналишларидаги бакалавриат таълим дастурлари ҳамда магистратура мутахассисликларидан иборат жами тўртта таълим дастури Германиянинг нуфузли "ASIIN" халқаро аккредитация агентлиги томонидан аккредитациядан муваффақиятли ўтди.
Мазкур натижа университетда таълим сифатини ошириш, ўқув жараёнини халқаро талаблар асосида ташкил этиш, замонавий таълим методларини жорий қилиш ҳамда кадрлар тайёрлаш тизимини такомиллаштириш йўлида олиб борилаётган изчил фаолиятнинг муҳим самараларидан биридир.
"ASIIN" халқаро аккредитацияси — таълим сифатининг муҳим эътирофи
"ASIIN" (Accreditation Agency for Degree Programmes in Engineering, Informatics, Natural Sciences and Mathematics) Германияда фаолият юритувчи, муҳандислик, информатика, табиий фанлар ва математика соҳаларидаги таълим дастурларини баҳолаш ҳамда аккредитациядан ўтказишга ихтисослашган халқаро агентлик ҳисобланади.
Ушбу агентлик томонидан ўтказиладиган аккредитация жараёни таълим дастурларининг мазмуни, ўқув натижалари, ўқитиш методлари, таълимни ташкил этиш механизмлари ва сифатни таъминлаш тизимини белгиланган мезонлар асосида баҳолашга қаратилган. Шу жиҳатдан, университет таълим дастурларининг халқаро аккредитациядан ўтиши уларнинг сифатини ташқи баҳолаш асосида эътироф этиш, мавжуд имкониятларни янада ривожлантириш ва таълим жараёнини халқаро мезонлар билан уйғунлаштиришда муҳим аҳамият касб этади.
Халқаро аккредитациядан ўтган таълим дастурлари
Қўқон давлат университетининг қуйидаги бакалавриат таълим йўналишлари ва магистратура мутахассисликлари "ASIIN" халқаро аккредитациясидан муваффақиятли ўтди:
Бакалавриат таълим йўналишлари:
- 60530100 — Кимё;
- 60510100 — Биология.
Магистратура мутахассисликлари:
- 70530104 — Аниқ ва табиий фанларни ўқитиш методикаси (кимё);
- 70510105 — Аниқ ва табиий фанларни ўқитиш методикаси (биология).
Мазкур тўртта таълим дастурининг халқаро аккредитациядан ўтиши университетда кимё ва биология соҳалари бўйича мутахассислар тайёрлаш сифатини ошириш, ўқув дастурларини замонавий талаблар асосида ривожлантириш ҳамда таълим натижаларини халқаро мезонлар билан уйғунлаштириш борасидаги ишларнинг муҳим натижасидир.
Таълим сифати ва халқаро ҳамкорликни ривожлантириш йўлида муҳим қадам
Бугунги кунда олий таълим муассасалари олдида нафақат юқори малакали мутахассислар тайёрлаш, балки уларнинг билим ва кўникмаларини халқаро меҳнат бозори талабларига мослаштириш вазифаси ҳам турибди. Бунинг учун таълим дастурларини мунтазам такомиллаштириш, назарий билимларни амалий машғулотлар билан уйғунлаштириш, илмий-тадқиқот фаолиятини ривожлантириш ва таълим сифатини баҳолашнинг самарали механизмларини жорий этиш талаб этилади.
Халқаро аккредитация ушбу вазифаларни амалга оширишда муҳим воситалардан бири бўлиб, таълим дастурларининг кучли жиҳатларини аниқлаш, ривожлантириш зарур бўлган йўналишларни белгилаш ва сифатни доимий равишда ошириб боришга хизмат қилади. Шу билан бирга, халқаро баҳолаш жараёнларида иштирок этиш университетнинг таълим соҳасидаги тажрибасини кенгайтириш, илғор хорижий амалиётларни ўрганиш ва уларни маҳаллий таълим жараёнига татбиқ этиш учун ҳам имконият яратади.
Қўқон давлат университетининг тўртта таълим дастури халқаро аккредитациядан ўтгани таълим сифатини таъминлаш борасидаги ишларни янги босқичга олиб чиқиш учун муҳим асос бўлиб хизмат қилади.
Мазкур ютуқ, айниқса, кимё ва биология йўналишларида таҳсил олаётган талабалар ҳамда магистрантларнинг касбий тайёргарлигини такомиллаштириш, профессор-ўқитувчиларнинг педагогик ва илмий салоҳиятини ривожлантириш, таълим жараёнига замонавий ёндашувларни кенг жорий этиш нуқтаи назаридан алоҳида аҳамиятга эга.
Ҳамроз Баёнов,ЎзА
