Зеленский: Украинада келаси йил 10 000 километрга уча оладиган дрон бўлади
Кейинги йил Украинада 5 000-10 000 километр масофага уча оладиган дрон пайдо бўлади. Президент Владимир Зеленский бу ҳақда Трампнинг яқин ҳамкори – MAGA блогери Лори Лумерга берган интервьюсида маълум қилди.
Давлат раҳбарининг сўзларига кўра, Украинада аллақачон 3000 километрдан узоққа учадиган учувчисиз учиш қурилмалари мавжуд ва бу йил аслаҳа захираси 4000 км масофага етадиган дронлар қўшилади.
Президент Украина АҚШ билан биргаликда дрон ишлаб чиқариш бўйича кенг кўламли келишув тузишга интилаётганини маълум қилди. Ҳамкорликнинг биринчи босқичи аллақачон амалга оширилди, кейинги режа бўйича ҳужжат ҳам деярли тайёр. У битимни Президент Трамп билан бирга имкон қадар тезроқ имзолашга умид билдирди.
Киев Қўшма Штатларда бирга дрон ишлаб чиқаришни ташкил этиш таклифини илгари сурмоқда. Украина дрон ишлаб чиқарувчилари лойиҳага қўшилиши мумкин. Ташаббусни амалга оширишда хусусий бизнес иштирок этади.
Шунингдек, Зеленский технология ривожланиши туфайли дрон тизими тез ўзгараётганига ҳам эътибор қаратди.
– Ҳар 3-6 ойда янги русум пайдо бўляпти, – деган Украина етакчиси. – Шунинг учун дронни доимий равишда ишлаб чиқариб, омборда тўпланмаслигини таъминлаш керак.
С.Раҳимов, ЎзА
