Зеленский Трампнинг энергетика бўйича сулҳ таклифига жавоб берди (+видео)
Украина президенти Володимир Зеленский АҚШ таклиф қилган Украина ва Россиянинг энергетика инфратузилмаси объектларига ҳужум қилишни тўхтатиш ташаббусини қўллаб-қувватлашга тайёрлигини билдирди, деб хабар берди DW .
Зеленский 14 сентябрь куни украиналикларга қилган видеомурожаатида Киев кескинликни пасайтириш учун фақат АҚШ Россияни урушни тўхтатишга ҳақиқатан ҳам тайёр ҳолатга келтира олишига ишонч ҳосил қилганидан кейин бундай шартга қадам ташлашини маълум қилди.
«Ҳозир АҚШ томонидан муҳим инфратузилма объектларига ўзаро ҳужумларни тўхтатиш бўйича жиддий таклиф бор. Агар бу кескинликни пасайтиришдаги биринчи қадам бўлиши мумкин бўлса, яъни Россиянинг бизнинг муҳим инфратузилмамизга ҳужумларини ва Украина томонидан берилаётган жавоб зарбаларини тўхтатиш назарда тутилса, Украина бундай қадамни қўллаб-қувватлашга тайёр», — деди Зеленский.
«Бизга кучли ва адолатли қарор керак. Бу вақтинчалик эмас, узоқ муддатга мўлжалланган бўлиши лозим. Ҳамкорларимиздан аниқ таклифларни кутяпмиз», — деди Владимир Зеленский.
АҚШ президенти Дональд Трамп ижтимоий тармоқда Россия ва Украина бир-бирининг энергетика инфратузилмасига ҳужум қилишни тўхтатишга келишганини ёзган эди.
Трамп дизель ёқилғиси нархининг дунё бўйлаб ошишини асосан Россия ва Украина ўртасидаги уруш билан боғлади. У бу ҳолатни АҚШ ва Эрон ўртасидаги можаро билан боғлаш нотўғри эканини айтди.
Россия ҳукумати ҳозирча Оқ уй раҳбарининг бу баёнотига расмий муносабат билдирмади.
Financial Times газетаси Кремль позициясидан хабардор манбаларга таяниб ёзишича, Россия президенти Владимир Путин қиш келгунига қадар Украина энергетика инфратузилмасига ҳужумларни тўхтатмоқчи эмас. Путиннинг фикрича, энергетика объектларига ҳужумларни давом эттириш Киевга босимни кучайтириши ва Украинани ён беришга мажбур қилиши мумкин.
Кенжа Бекжонов, Салимжон Обиджонов, ЎзА
