Зеленский Сербияга боради
Украина Президенти Владимир Зеленский 8 август куни расмий ташриф билан Сербияга боради. Бу унинг 2019 йил давлат раҳбарлигини қабул қилиб олгани ҳамда 2022 йил Украинада кенг кўламли ҳарбий ҳаракат бошланганидан бери Белградга амалга оширадиган илк ташрифидир.
AFP агентлигига маълумот берган юқори лавозимли украиналик мулозим таъкидлашича, ушбу сафардан кўзланган асосий мақсад Сербия билан икки томонлама муносабатни қайта жонлантириш. Сербия Европа қитъасида Россия билан энг яқин дўстона алоқани сақлаб қолаётган давлатлардан биридир. Мамлакат РФ ва Украина низоси авж олгандан кейин ҳам Москвага қарши киритилган санкцияга қўшилмай, РФ билан энергетика соҳасидаги яқин ҳамкорликни давом эттирди. Сербия Президенти Александр Вучич 2022 йилдан бери Россия Президенти Владимир Путин билан камида икки марта шахсан учрашган.
Бинобарин, уруш бошлангандан буён Зеленский ва Вучич ўртасида ҳам уч марта юзма-юз мулоқот бўлиб ўтган. Сербия расман ЕИга аъзо бўлишга интилаётган бўлса-да, Брюссель расмий Белграднинг Москва билан яқин алоқаларини мунтазам танқид қилиб келади. Бундан ташқари энергетика соҳасида ҳамон Россияга қарам бўлиб қолаётган Сербия сўнгги йилларда ўн минглаб россиялик кўчиб ўтган асосий манзиллардан бирига айланган.
Ф.Яхшибоева, ЎзА
