Өзбекстанның алғашқы спутнигі орбитаға сәтті ұшырылды
Ғарыш технологияларын дамыту – ғылым мен инновацияны ілгерілетудің маңызды бағыттарының бірі. Осыған орай кейінгі жылдары Өзбекстан бұл саладағы халықаралық ынтымақтастықты күшейтіп, заманауи ғарыштық жобаларды жүзеге асыруға басымдық беріп келеді.
Өзбекстанның ғарыш саласы тарихында жаңа белес басталды: 2026 жылғы 5 тамызда Қытайдың Хайян шығыс ғарыш айлағынан «Узбеккосмос» агенттігі мен «STAR.VISION» компаниясының бірлескен жобасы – «Самарқанд-2028» Жерді қашықтан зондтайтын жасанды жер серігі орбитаға сәтті ұшырылды.
Ел тарихындағы ең ірі халықаралық ғарыштық бастама саналатын бұл жоба Өзбекстан мен Қытай арасындағы ғылыми-технологиялық ынтымақтастықты жаңа деңгейге көтерді.
Жобаның басты ерекшеліктерінің бірі – «Узбеккосмос» инженерлері әзірлеген жасанды интеллект модулінің алғаш рет «STAR.VISION» компаниясының халықаралық жер серігіне біріктірілуі. Бұл технология ақпаратты тікелей орбитада өңдеуге мүмкіндік беріп, берілетін деректер көлемін азайтады әрі талдау үдерісін жеделдетеді.
[gallery-30731]
«Самарқанд-2028» ауыл шаруашылығы, экология, су ресурстарын басқару, табиғи ресурстарды мониторингтеу, төтенше жағдайлардың алдын алу және қала құрылысы сияқты салаларда ғарыштық технологияларды тиімді пайдалануға жол ашады. Сонымен қатар елдің жасанды интеллект пен ғарыш инженериясы бағытындағы ұлттық әлеуетін нығайтуға ықпал етеді.
Жасанды жер серігіне «Самарқанд-2028» атауының берілуі де символдық мәнге ие. Бұл атау Самарқанд қаласының 2028 жылы өтетін 79-шы Халықаралық астронавтика конгресін қабылдайтын қала ретінде таңдалуына байланысты қойылған. Осы арқылы Өзбекстанның әлемдік ғарыш қауымдастығындағы беделінің артып келе жатқаны көрініс тапқан.
«Узбеккосмос» агенттігінің директоры Шухрат Қодыровтың айтуынша, бұл миссия Өзбекстанның ғарыштық технологияларды әзірлей алатын мемлекет ретіндегі әлеуетін айқын көрсетті. Ал өзбек мамандары жасаған жасанды интеллект модулінің халықаралық жобаға енгізілуі елдің ғарыш саласындағы маңызды жетістіктерінің бірі саналады.
Мамандардың пікірінше, «Самарқанд-2028» миссиясы Өзбекстанның жаһандық ғарыш экожүйесіне интеграциясын күшейтіп қана қоймай, Қытаймен стратегиялық серіктестікті нығайтуға, жасанды жер серігі технологиялары, жасанды интеллект және инженерлік кадрлар даярлау бағытындағы жаңа бірлескен жобалардың жүзеге асуына берік негіз қалайды.
суреттерді түсірген Н.Хайдаров, ӨзА
