Өзбекстанда 4,6 миллион тонна мақта жиналып, меже 103 пайызға орындалды
2026 жылғы мақта жинау науқанында еліміздің диқандары елеулі нәтижеге қол жеткізді. Биылғы 22 қазан күнгі жағдай бойынша Өзбекстанда 4 миллион 630 мың тонна мақта жиналды. Бұл белгіленген жоспардың 103 пайызын құрайды.
Әдетте маусымның соңғы кезеңінде тіркелетін жоғары көрсеткішке қазан айының екінші жартысында-ақ қол жеткізілуі мақта шаруашылығындағы маңызды жетістіктердің бірі болды.
Мұндай нәтижеге фермер қожалықтарының, мақта-тоқыма кластерлерінің, механизаторлардың және науқанға қатысқан мыңдаған еңбеккердің күш-жігерінің арқасында қол жеткізілді.
Мақта терімінде заманауи техникаларды пайдалану көрсеткіші де жоғары. Бүгінге дейін 3 миллион 515 мың 597 тонна мақта терім машиналарының көмегімен жиналды. Бұл жұмысқа 3 мыңға жуық заманауи мақта теру машинасы тартылды.
Республика бойынша мақта терімін механикаландыру деңгейі орта есеппен 76 пайызды құрады. Өңірлер арасында бұл көрсеткіш Жызақ облысында 98,5 пайызға, Сырдария облысында 94,2 пайызға, Ташкент облысында 81,2 пайызға жетті. Жалпы, облыстардағы механикаландыру деңгейі 61 пайыздан 98,5 пайызға дейін болды.
Қазір алқаптарда мақта теру жұмыстары жалғасып жатыр. Атап айтқанда, 49 мың гектардан астам жерде алғашқы терім жүргізіліп, өсірілген өнімді қысқа мерзімде әрі шығынсыз жинауға ерекше көңіл бөлініп келеді.
Мамандардың пікірінше, биылғы маусымдағы нәтижелерге заманауи агротехнологияларды қолдану, механикаландыру, ғылыми әзірлемелер мен озық тәжірибелерді өндіріске енгізу салаға елеулі ықпал етті. Жыл бойы еліміздің өңірлерінде ұйымдастырылған практикалық семинарлар, ғалымдардың зерттеулері мен ғылыми ұсынымдар негізінде атқарылған жұмыстар сала тиімділігін арттыруға септігін тигізді.
Ауыл шаруашылығында ғылым жетістіктерін пайдалану, еңбек өнімділігін арттыру және заманауи техникаларды кеңінен енгізу мақта шаруашылығының әлеуетін одан әрі арттырудың маңызды факторлары саналады.
4,6 миллион тоннадан астам мақтаның жиналуы — маусымның маңызды нәтижесінің бірі. Ендігі басты міндет — алқаптарда қалған өнімді сапалы әрі шығынсыз жинап алу.
