Өзбекстанда қолма-қол шетел валютасын паспортсыз сатып алу лимиті ұлғаюы мүмкін
Өзбекстан Республикасының Орталық банкі қолма-қол шетел валютасын жеке басын куәландыратын құжатсыз сатып алу лимитін арттыруды ұсынды. Бұл туралы реттеуші ұсынған және қоғамдық талқылауға шығарылған қаулы жобасында мәлім болды.
Жобаға сәйкес, қазіргі 100 АҚШ доллары көлеміндегі лимитті 500 АҚШ долларына дейін ұлғайту жоспарланып отыр. Егер бұл өзгеріс қабылданса, 500 доллар эквивалентіне дейінгі қолма-қол шетел валютасын сатып алу кезінде паспорт ұсыну талап етілмеуі мүмкін.
Сонымен қатар, клиенттерді тиісті тәртіппен тексеру шаралары сақталады. Олар клиенттің жеке басын сәйкестендіру және растау, оның атынан әрекет ететін тұлғаның өкілеттігін тексеруді қамтиды. Бұдан бөлек, банктер бенефициарлық меншік иесін анықтап, операциялардың мақсаты мен сипатын зерделеп, қажет болған жағдайда қаражаттың шығу көзін бақылап отыруы тиіс.
Қаулы жобасында банк шотын ашпай жүзеге асырылатын операциялар бойынша тексеру шектерін өзгерту де қарастырылған. Қазіргі уақытта мұндай тексерулер базалық есептік мөлшердің 500 есесіне тең немесе одан жоғары сомаға (шамамен 206 млн сум) қатысты жүргізіледі. Жобада бұл шекті 175 миллион сум көлемінде нақты белгілеу ұсынылған.
Орталық банктің түсіндірме хатында бұл өзгерістер халыққа қосымша қолайлылық жасауға бағытталғаны айтылады. Сондай-ақ тексеру шектері FATF – қылмыстық жолмен алынған кірістерді заңдастыруға қарсы іс-қимыл жөніндегі халықаралық ұйымның 10-ұсынысына сәйкестендірілуде.
Аталған ұсынымдарға сәйкес, бір реттік операциялар бойынша тексеру шегі 15 мың АҚШ долларын құрайды. Ал қазіргі қолданыстағы шек (шамамен 16,9 мың доллар) бұл көрсеткіштен жоғары. Осыған байланысты шекті соманы 175 миллион сум деңгейінде белгілеу ұсынылып отыр.
Айта кетілгендей, бұл қаулы жобасы қоғамдық талқылаудан кейін түпкілікті нұсқада қабылданады.
