Ёқилғи қуйиш шохобчаларида нақдсиз тўловлар улуши кескин ошди
Ёқилғи қуйиш шохобчаларида нақдсиз тушумлар улуши ошмоқда. Хусусан, жорий йилнинг 3-8 апрель кунлари Ўзбекистонда автомобилларга ёқилғи қуйиш шохобчаларида амалга оширилган тушумлар барқарор юқори кўрсаткичларни қайд этди.
Бу ҳақда Марказий банки маълум қилди.
Қайд этилишича, 3 апрель куни ёқилғи қуйиш шохобчаларида тушумлар 92,0 млрд. сўмни ташкил этган. Кейинги уч кун — 4, 5 ва 6 апрель кунларида умумий тушум 395,5 млрд. сўмга етган. Мутахассислар бу ҳолатни транспорт ҳаракатининг фаоллиги ҳамда ёқилғига бўлган талабнинг юқори бўлгани билан изоҳламоқда.
7 апрель куни тушумлар 116,1 млрд. сўм, 8 апрель куни эса 117,1 млрд. сўмни ташкил этган. Умуман олганда, ҳафталик динамикада ёқилғи қуйиш шохобчаларида тушумлар барқарор ўсиш тенденциясини сақлаб қолган.
Таҳлилларга кўра, ушбу даврда амалга оширилган тўловларнинг 92-95 фоизи банк карталари орқали бажарилган. Бу эса аҳоли ва тадбиркорлар ўртасида нақдсиз ҳисоб-китоблар кенг оммалашаётганини кўрсатади.
Нақдсиз тўловлар улушининг ошиши молиявий шаффофликни таъминлаш, иқтисодиётда “соя” айланмасини камайтириш ва тўлов тизимларини рақамлаштириш жараёнларини жадаллаштиришга хизмат қилмоқда.
Ҳозирги кунда мамлакатда 70 миллиондан ортиқ банк карталари муомалада бўлиб, шундан 170 мингга яқини момент карталар ҳисобланади. Шунингдек, 60 мингдан ортиқ ёқилғи карталари фаоллаштирилган.
Бундан ташқари, республика бўйича 46 мингдан зиёд банкомат, ADM ва инфокиосклар аҳолига хизмат кўрсатмоқда. Уларнинг 7 мингдан ортиғи нақд пул қабул қилувчи қурилмалар ва ADMлардан иборат.
Нақдсиз ҳисоб-китоблар инфратузилмасининг кенгайиши ёқилғи қуйиш шохобчаларида хизмат кўрсатиш тезкорлиги ва қулайлигини оширишга хизмат қилмоқда.
Ш.Маматуропова, ЎзА
