Яширин иқтисодиёт — ошкора зарар (+видео)
Бугунги кунда дунё мамлакатлари олдида турган энг жиддий муаммолардан бири бу — яширин иқтисодиётдир. У расмий статистикада акс этмайди, лекин давлат бюджетига катта салбий таъсир кўрсатади, қонуний фаолият юритаётган тадбиркорларни нотенг рақобатга дучор қилади ва жамиятда адолатсизлик ҳиссини кучайтиради.
Бозор иқтисодиётига ўтиш жараёнида тадбиркорлик учун имкониятлар кенгайиб бормоқда, бироқ унинг ортидан яширин савдо, бухгалтерия бўйича икки хил ҳисоб юритиш, истеъмолчиларга нотўғри маълумот бериш орқали солиқлардан қочиш ҳолатлари ҳам кучайди.
Маълумотларга кўра, Тошкент шаҳрида яширин ва кузатилмайдиган иқтисодиёт 60 триллион сўмга етган, бу бюджет йилига 7,5 триллион сўмни йўқотиш дегани. Биргина акциз солиғи тўловчилар ишлаб чиқариш ва реализация ҳажмини яширгани оқибатида 66 миллиард сўм солиқдан қочилган.
Ушбу ҳолатлардан келиб чиққан ҳолда, яширин иқтисодиётнинг Ўзбекистон бюджетига кўрсатаётган салбий таъсири кўламини тасаввур қилиш қийин эмас.
Шу боис, охирги йилларда Ўзбекистон ҳукумати томонидан иқтисодиётни рақамлаштириш, хусусан, электрон тўлов тизимларини жорий этиш – яширин иқтисодиётга қарши курашнинг асосий қуроли сифатида илгари сурилмоқда.
<iframe width="560" height="315" src="https://www.youtube.com/embed/bQCxvUMQ9c8?si=0mTIaNROtRZi4Wml" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳайё Турдалиева, Анвархўжа Аҳмедов, ЎзА
