Венадағы халықаралық конференцияда Өзбекстанның балалар құқықтарын қорғау тәжірибесі таныстырылды
Австрияның Вена қаласында ЕҚЫҰ ұйымдастыруымен Адам саудасына қарсы альянстың «Қылмысқа мәжбүрлі тарту түрлерінің артуы: қауіпсіздік жүйесіндегі әлсіз тұстарды жою» тақырыбындағы халықаралық конференциясы өтіп жатыр.
Аталған жиында жаһандық және қоғамдық қауіпсіздікке қауіп төндіретін қылмысқа тарту тәуекелдері жан-жақты талқыланды.
Қатысушылардың айтуынша, мұндай жағдайларда жәбірленушілердің басым бөлігі – балалар мен әлеуметтік тұрғыдан осал топтағы адамдар. Алайда олар көбіне жәбірленуші емес, керісінше қылмыскер ретінде бағаланып жатады. Бұл өз кезегінде ұйымдасқан қылмыстық топтардың жазасыз әрекет етуіне жол ашады.
Осы беделді жиында Өзбекстанның Бала құқықтары жөніндегі омбудсманы Сурайё Рахмонова сөз сөйлеп, елімізде балалардың құқықтарын қорғау бағытында жүзеге асырылып жатқан шаралар туралы халықаралық қауымдастықты хабардар етті.
Атап өтілгендей, Өзбекстанда балалардың осал жағдайын пайдаланып, оларды қылмыстық әрекеттерге тартудың алдын алу үшін қатаң шаралар қабылданып жатыр.
Атап айтқанда, есірткі мен наркоқылмысқа қарсы күрес жөніндегі Ұлттық стратегия қабылданған. Осы құжат аясында кәмелетке толмағандарды есірткі немесе күшті әсер ететін заттарды тұтынуға тарту, сондай-ақ балалардың қатысуымен жасалған кез келген наркоқылмыс ауыр қылмыс ретінде қарастырылады.
Сонымен қатар, балалар порнографиясын тарату үшін қылмыстық жауапкершілік енгізілген. Кәмелетке толмағандарға қатысты жасалған ауыр жыныстық қылмыстар үшін өмір бойына бас бостандығынан айыру жазасы қарастырылғаны да атап өтілді.
Конференцияға ЕҚЫҰ-ға мүше 57 мемлекеттен және альянс серіктестері саналатын ірі халықаралық әрі үкіметтік емес ұйымдардан өкілдер, азаматтық қоғам мүшелері, сарапшылар мен сала мамандары қатысып, балалар құқықтарын қорғау саласындағы озық тәжірибелерге ерекше назар аударды.
