Украина қорғаныс саласына қаржы тапшылығы бар екені белгілі болды
Украина президенті Володимир Зеленский Киевте өткен «Тілек білдірушілер коалициясы» саммитінің қорытындысына арналған баспасөз мәслихатында елдің қорғаныс саласында елеулі қаржы тапшылығына тап болғанын мәлімдеді.
Оның айтуынша, Украинаға 2026 жылы қорғаныс шығындарын өтеу үшін шамамен 27 миллиард доллар қажет.
«Қарулы күштерді қаржыландыру үшін мемлекеттік бюджетте қалыптасқан тапшылық 27 миллиард долларды құрайды. Қорғаныс министрлігіне жыл бойына бөлінген қаржылық көмек пен бюджет қаражаты тамыз айына дейін толық жұмсалған», - деген ол.
Украина басшысы өз сөзінде Ресей армиясының тактикасына да тоқталды. Оның атап өтуінше, соққылар тек әскери нысандарға ғана емес, маңызды азаматтық инфрақұрылымға да жасалып отыр. Атап айтқанда, ауруханалар, мектептер мен тұрғын үйлерге бағытталған шабуылдар бейбіт тұрғындарға қарсы агрессиялық әрекеттердің бір бөлігіне айналған.
Киевтегі саммит барысында Украина одақтастары әуе қорғанысын күшейту және әскери көмекті жалғастыру мәселелерін талқылады. Саммит қорытындысында Украинаға қосымша «Patriot» зымырандарын жеткізу жөнінде келісімдер жасалғаны хабарланды.
