Трамп: Украинага янги президент керак (+видео)
Россия 60 кун давомида тўлиқ ўт очишни тўхтатишга рози бўлса, Украина президентлик сайловини ўтказиши мумкин. Бу ҳақда Владимир Зеленский АҚШнинг ABC телеканали эфирида маълум қилди.
«Илтимос, Путинга етказинг: бизга икки ой, яъни 60 кун давомида тўлиқ ўт очишни тўхтатиш имконини берсин. 60 кун бўлса, биз сайловни ташкил қиламиз», — деган Зеленский.
Шунингдек, у «Президент Трампни қанчалик ҳурмат қилмасин», раҳбарни танлаш ҳуқуқи айнан Украина фуқароларига тегишли эканини таъкидлади.
Дастур бошловчиси АҚШ етакчиси ва америкалик миллиардер Илон Маск нега Зеленскийни урушни давом эттиришда айблаётгани ҳақида сўради. Жавоб шундай бўлди:
– Вашингтон Россия Президенти Владимир Путинни тўхтатиш йўлини топа олмаяпти, чунки бу иш бошқаларга босим ўтказишдан кўра қийинроқ. Нарх ҳақида гапириш ва ҳолатни Киев билан боғлаш эса осонроқ.
Бу баёнот Трамп Украина келишувга эриша оладиган янги президент топиши кераклигини айтгандан бир кун ўтиб янгради.
«Зеленский кўплаб келишувларга эришиши мумкин эди, аммо қандайдир сабабларга кўра бундай қилмади», — деди АҚШ раҳбари.
Шунингдек, Трамп Зеленский АҚШнинг Россиядаги нефтни қайта ишлаш заводларига ҳужумни тўхтатиш ҳақидаги талабини эътиборсиз қолдирганини ҳам таъкидлади. Унинг фикрича, бундай ҳужум «жаҳон миқёсида муаммо» келтириб чиқармоқда.
Украина Президенти эса бугуннинг ўзида энергетика объектларига ҳужум тўхтатилиши мумкинлиги, аммо Путин буни истамаётганини айтар экан, агар Россия бизнинг энергетика инфратузилмамизга ҳужум қилишни тўхтатса, Украина ҳам Россиянинг нефтни қайта ишлаш заводларига зарба беришни тўхтатишга тайёр», — деди.
Таъкидланишича, кескинликни юмшатишга қаратилган ҳар қандай қадам икки томонлама бўлиши ва аниқ кафолат билан мустаҳкамланиши керак.
Кенжа Бекжонов, Салимжон Обиджонов (видео), ЎзА
