Трамп: Россия ва Украина энергетик сулҳга келишди (+видео)
АҚШ Президенти Дональд Трамп якшанба куни ижтимоий тармоқда Россия ва Украина энергетика объектларига ўзаро ҳужумни зудлик билан тўхтатишга келишганини маълум қилди. Зеленский эса аввал хабари бўлмаган бу келишувни қўллаб-қувватлашга тайёрлигини билдирди, деб ёзган “Euronews”.
«Шу пайтдан бошлаб Россия ва Украина ўртасидаги урушда энергетика соҳасида ўзаро ҳужумни тўхтатиш тартиби кучга киради. Иккала томон ҳам бунга рози» — деб ёзди у. РФ ҳозирча бу ахборотни тасдиқлагани йўқ.
Зеленскийнинг ўзи ҳам ижтимоий тармоқда шу хабарга муносабат билдирди:
– Украина бу сулҳни маъқуллайди, – деб ёзган Зеленский. – Россия ҳам қўллаб-қувватлаши муҳим. Биз Америка томонидан батафсил маълумот берилишини кутяпмиз. Украина ўз навбатида кескинликни юмшатиш, инсонлар ҳаётини ҳимоя қилиш, урушни тугатиш ва узоқ муддатли тинчликни таъминлаш учун зарур чоралар кўрилишига ҳар доим тўлиқ содиқ. Бугуннинг ўзида энергетика нишонларига ҳужумни тўхтатиш мумкин.
Зеленский вазиятни юмшатишга қаратилган ҳар қандай қадам икки томонлама бўлиши ва аниқ кафолат билан мустаҳкамланиши кераклигини таъкидлади.
– Путин Украина Президенти алмашишини жуда хоҳлайди, биламан, – деган Украина етакчиси. – Буни тушунаман. Мен Трамп жамоасига айтдим: Агар Президент ҳақиқатан сайлов орқали қандайдир ўзгариш бўлишини истаса, икки ой, яъни 60 кун давомида ўт очиш тўлиқ тўхтатилсин, биз сайлов ташкил қиламиз. Украина халқининг ҳар қандай танловини қабул қилишга тайёрмиз.
Таъкидланишича, Украина уруш ҳолатида бўлгани учун сайлов ўтказиш жуда қийин. Бу нафақат хавфсизлик, балки сайлов ўтказишга доир амалдаги қонун ва Конституцияга зидлиги билан ҳам боғлиқ.
Кенжа Бекжонов, Анвархўжа Аҳмедов (видео), ЎзА
