Тошкентда “Турк кино кунлари” бўлиб ўтади
Тошкент шаҳрида Ўзбекистон ва Туркия ўртасидаги маданий ҳамкорликни янада мустаҳкамлашга қаратилган “Ўзбекистон – Туркия маданият ва санъат учрашувлари – Турк кино кунлари” тадбирлари ўтказилади.
Ўзбекистон Республикаси Мустақиллигининг 35 йиллиги муносабати билан ташкил этилаётган маданий тадбирлар 24–29 сентябрь кунлари бўлиб ўтади.
“Турк кино кунлари”нинг тантанали очилиш маросими 25 сентябрь куни соат 18:30 да Ўзбекистон Миллий кино санъати саройида ўтказилади. Унда Туркия кинематографиясининг таниқли вакиллари иштирок этади. Туркиялик актёрлар тадбир доирасида ўзбек томошабинлари билан учрашиб, ижодий мулоқот ўтказиши кутилмоқда.
Очилиш маросимидан сўнг “Аждодлар садоси” фильми намойиш этилади.
Шунингдек, 26 сентябрь куни “Кесилган дарахтдек”, 27 сентябрь куни “Бахтлимизми?”, 28 сентябрь куни “Қара, почтачи келяпти” ҳамда 29 сентябрь куни “Изқувар Рептир” фильмлари томошабинлар эътиборига ҳавола этилади.
Тадбирлар Ўзбекистон Миллий кино санъати саройида бўлиб ўтади.
“Турк кино кунлари” икки мамлакат ўртасидаги маданий-гуманитар алоқаларни кенгайтириш, кино санъати соҳасида ижодий ҳамкорликни ривожлантириш ҳамда турк кинематографиясининг энг яхши намуналарини ўзбек томошабинларига танитишга хизмат қилади.
Н.Усмонова,
ЎзА
