Суперлига: Чемпионлик учун кураш давом этади

Бугун Ўзбекистон Суперлигасининг 13-тур баҳсларига старт берилади. Уч кун давом этадиган тур доирасида жамоалар турнир жадвалидаги ўринларини яхшилаш ҳамда чемпионлик учун курашда муҳим очколарни қўлга киритишга интилади.

Турнинг илк кунида учта учрашув бўлиб ўтади. «Бухоро» ўз майдонида «Бунёдкор»ни қабул қилса, амалдаги пешқадамлардан бири «Пахтакор» «Хоразм»га қарши майдонга тушади. Марказий баҳслардан бири эса Жиззахда бўлиб ўтади, унда «Сўғдиёна» чемпионат етакчиси «Нефтчи» билан куч синашади.

"Пахтакор" - "Хоразм" тўқнашуви олдидан жамоаларнинг ўзаро ўйинлари статистикасини эътиборингизга ҳавола этишни лозим топдик.

Клублар жами 18 беллашувда куч синашган. Улардан 13 тасида "шерлар", иккитасида рақиблар зафар қучган. 3 ўйинда дуранг қайд этилган. Хоразмликлар дарвозаси 37 бор ишғол этилган ва 11 тўп ўтказиб юборилган. Тўплар нисбати 19:5 ни ташкил этади.

"Пахтакор" ва "Хоразм" жамоалари ўртасидаги ўйин 21 июль куни соат 20:00да "Пахтакор" стадионида бошланади.

22 июль куни «Машъал» – «Насаф», «Локомотив» – «Андижон» ҳамда «Қўқон-1912» – ОКМК жамоалари ўртасидаги баҳслар ўтказилади. Мазкур учрашувлар ҳам турнир жадвалида юқори ўринлар учун кураш нуқтаи назаридан алоҳида аҳамият касб этади.

Турнинг сўнгги кунида эса «Сурхон» ўз майдонида «Динамо»ни қабул қилади. Шунингдек, Наманганда «Навбаҳор» ва «Қизилқум» жамоалари ўзаро баҳс олиб боради.

13-тур учрашувлари якунига кўра, Суперлига турнир жадвалидаги вазият янада ойдинлашиши ва чемпионлик ҳамда совринли ўринлар учун кураш янада қизғин тус олиши кутилмоқда.

Жавоҳир Тошхўжаев,

ЎзА