SQB: тадбиркорлик лойиҳалари – ишлаб чиқариш, экспорт ва янги иш ўринлари
Жорий йилнинг 25 август куни Ўзсаноатқурилишбанк (SQB)да тадбиркорлик субъектларини қўллаб-қувватлаш бўйича амалга оширилган ишлар ва эришилган натижаларга бағишланган брифинг ўтказилди.
Мамлакатимизда тадбиркорликни ривожлантириш сиёсати доирасида бизнеснинг турли босқичларида молиявий ресурсларга етиб боришини енгиллаштириш, ишлаб чиқаришни кенгайтириш, экспортни рағбатлантириш ва янги иш ўринлари яратишга қаратилган янги механизмлар жорий этилмоқда.
Шу йил 18 август куни Хива шаҳрида ўтказилган Президентнинг тадбиркорлар билан VI очиқ мулоқотида бу борада янги вазифалар белгиланди. Жумладан, “Бизнес старт”, “Бизнес лифт” ва “Бизнес юксалиш” дастурлари орқали тадбиркорни бизнеснинг турли босқичларида қўллаб-қувватлаш, 10 миллиард сўмгача кредитларда “контркафолат” механизмини қўллаш назарда тутилди. Шунингдек, экспортчилар учун молиявий инструментларни кенгайтириш ва туризм лойиҳаларига қўшимча ресурс йўналтириш масалалари белгилаб берилди.
– Ушбу вазифалар тижорат банкларидан тадбиркорнинг молиявий эҳтиёжини унинг бизнес босқичи, ишлаб чиқариш салоҳияти ва бозор имкониятлари билан боғлаган ҳолда ишлашни талаб этади, – дейди “Ўзсаноатқурилишбанк” АТБ Бизнес бош директори Тимур Норов. – SQB тизимида ҳам тадбиркорлик субъектларини молиялаштиришда ана шу ёндашув асосида иш олиб борилмоқда. Бунда йирик саноат лойиҳаларидан тортиб микро, кичик ва ўрта бизнес ташаббусларигача қамраб олинган.
2026 йил 1 август ҳолатига кўра, банк томонидан 1830 га яқин мижозларнинг бизнес лойиҳалари молиявий қўллаб-қувватланиб, 24 мингга яқин иш ўрни яратилди. Бунда халқаро молия институтлари ресурслари ҳисобидан ўзлаштирилган молиялаштириш ҳажми 482,4 млн АҚШ долларини, хотин-қизлар ва ёшлар тадбиркорлигига йўналтирилган маблағ эса 880 млрд сўмдан зиёдни ташкил этди.
Молиялаштиришдан аниқ иқтисодий натижагача
Самарқанд вилоятидаги “AZIA METALL PROF” масъулияти чекланган жамияти қурилиш ва саноат учун металл маҳсулотлари ишлаб чиқаради. Корхона лойиҳасининг умумий қиймати 219,6 миллион АҚШ долларини ташкил этиб, шундан 50 миллион доллари SQB маблағлари ҳиссасига тўғри келади.
Молиялаштириш натижасида корхонанинг йиллик ишлаб чиқариш қуввати 2 бараварга ошди, 200 та янги иш ўрни яратилди. 2025 йилда корхона 140 миллион долларлик маҳсулот экспорт қилди. 2026 йилда эса бу кўрсаткични 280 миллион долларга етказиш режалаштирилган. Корхона маҳсулотлари Россия, Қозоғистон, Хитой, Туркия, Канада, Қирғизистон ва бошқа давлатларга етказиб берилмоқда.
Ташқи бозорга чиқиш билан бир қаторда, ички эҳтиёжни маҳаллий маҳсулот ҳисобига қоплаш ҳам молиялаштиришнинг иқтисодий самарасини белгилайди. Бу борада “ZHONGTIAN Chemical” МЧЖ фаолияти мисол бўла олади. Корхона олтин, кумуш, мис, қўрғошин ва рух каби рангли металл рудаларини бойитишда ишлатиладиган кимёвий реагентлар ишлаб чиқаради. Хом ашёнинг 90 фоизини маҳаллий ишлаб чиқарувчилардан харид қилади.
SQB 2024-2026 йилларда корхонага ксантат синтези линиясини харид қилиш ва айланма маблағни тўлдириш учун жами 5,65 миллион доллар кредит ажратди. Натижада 2025 йилда 43 миллиард сўмлик, 2026 йилнинг биринчи ярмида эса 45 миллиард сўмлик импорт ўрни босилди.
Йирик саноат лойиҳаларида натижа ишлаб чиқариш қуввати, экспорт ва маҳаллийлаштиришда кўринса, кичик бизнесда у янги хизмат ва иш ўринларида намоён бўлади. Хотин-қизлар тадбиркорлигини қўллаб-қувватлашга қаратилган “Ҳамроҳ” дастури доирасида “SEWING-TEXTILE” хусусий корхонасига 1 миллиард сўм кредит ажратилди. Маблағ янги қурилган меҳмонхона биносини жиҳозлашга йўналтирилди. Объект фойдаланишга топширилиб, 8 нафар киши иш билан таъминланди.
Рақамли хизматлардан бизнес қарорларигача
– Бугун тадбиркор учун молиявий ресурс билан бир қаторда вақт ҳам муҳим омилга айланди, – дейди Тимур Норов. – Банк хизматларини тез ва масофадан олиш, ҳисоб-китобларни қулай бошқариш бизнеснинг кундалик фаолиятига бевосита таъсир қилади. Шу боис SQB рақамли хизматларни тадбиркорлар учун асосий банк амалиётларини масофадан бажариш имконини берадиган йўналиш сифатида ривожлантирмоқда.
Бугунги кунда “SQB Business” мобил иловасида 55 мингдан ортиқ мижоз рўйхатдан ўтган, ойлик фаол фойдаланувчилар сони 27 минг нафарга етган. Илова орқали 62 триллион сўмлик транзакциялар амалга оширилган ва 335 миллиард сўм онлайн кредит ажратилган. Бизнес вакиллари унда ҳисоб рақамини масофадан очиши, барча турдаги тўловларни ўтказиши, валюта амалиётларини амалга ошириши, тўлиқ онлайн кредит олиши, экспорт-импорт шартномаларини бошқариши ҳамда QR-код орқали тўловларни қабул қилиши мумкин.
Рақамли хизматларнинг кейинги босқичи сунъий интеллект имкониятларидан фойдаланиш билан боғлиқ. Бунда мақсад тадбиркорга фақат тайёр банк хизматини тақдим этиш эмас, балки бизнес ғояни дастлабки босқичдаёқ иқтисодий жиҳатдан баҳолашга кўмаклашишдир.
Банк томонидан ишлаб чиқилган “SQB AI Maslahatchisi” фойдаланувчининг имкониятлари ва ҳудудий шароитни таҳлил қилиб, мақбул бизнес йўналишини танлашга кўмаклашади, зарур инвестиция ҳажми, рентабеллик ва лойиҳани амалга ошириш босқичларини шакллантиради. Шу тариқа бизнес ғояни молиялаштиришдан олдин уни аниқ ҳисоб-китоб асосида баҳолаш имкони кенгаяди.
Брифингда 2026 йил якунига қадар офлайн кредитлар бўйича ҳам илова орқали ариза топшириш ва скорингдан ўтиш, онлайн кредит аризаларини кўриб чиқиш жараёнини “AI Mahalla” тизими билан интеграция қилиш режалаштирилгани қайд этилди.
Тадбиркорликни қўллаб-қувватлашда натижа фақат ажратилган кредит ҳажми билан ўлчанмайди. Маблағ ҳисобига янги қувват ишга тушиши, импорт ўрнини маҳаллий маҳсулот эгаллаши, экспорт бозорининг кенгайиши, янги хизмат ва иш ўринларининг пайдо бўлиши молиялаштиришнинг иқтисодий самарасини кўрсатади.
Шу боис Ўзсаноатқурилишбанк бундан буён ҳам тадбиркорларнинг ғоясини молиявий ечимлар билан боғлаш, истиқболли лойиҳаларни қўллаб-қувватлаш ва уларнинг аниқ иқтисодий натижага айланишига кўмаклашишга устувор аҳамият қаратади.
“Ўзсаноатқурилишбанк” АТБ
Ташқи алоқаларни мувофиқлаштириш хизмати
