Россия бензин экспортига вақтинча тақиқ қўйди
Россия ҳукумати 1 апрелдан бошлаб бензин экспортини вақтинча чеклашга қарор қилди. Бу чорадан кўзланган асосий – мақсад мамлакат ички бозорида ёнилғи танқислигининг олдини олиш ва нарх кескин ошишига йўл қўймаслик.
Ҳужжат Бош вазир ўринбосари Александр Новак раҳбарлигида ўтказилган йиғилишда тасдиқланди. Энергетика вазирлиги тегишли лойиҳани қисқа муддатда ишлаб чиқиши белгиланди.
Ҳукумат экспортни чеклашга мажбур бўлишининг бир неча асосий сабаби бор. Биринчидан Яқин Шарқдаги беқарорлик жаҳон нефть бозорини тебратиб, нарх тез-тез ўзгаришига сабаб бўлмоқда. Иккинчидан ташқи бозорда РФ энергия ресурсларига талаб юқорилиги боис жуда кўп маҳсулот хорижга чиқиб кетиши хавфи ички бозорда танқислик келтириб чиқариши мумкин. Учинчидан баҳорги қишлоқ хўжалиги мавсуми ва талаб ортиши даврида ёнилғи нархини назорат қилиш ҳукумат учун стратегик аҳамиятга эга.
Экспортни чеклаш орқали Россия нефтни қайта ишлаш заводлари маҳсулотини биринчи навбатда ички бозор эҳтиёжига йўналтиришни режалаштирмоқда. Бу эса ёнилғи қуйиш шохобчаларида нархни барқарор сақлашга ёрдам беради.
Ф.Яхшибоева, ЎзА
