Пракаш Кежривал: "Ўзбекистонда хотиржам фаолиятга ишончимиз ошди” (+видео)
Ўзбекистон иқтисодиёти жадал ривожланиб, сўнгги йилларда саноат тармоқларида 3 минг турдаги янги маҳсулотлар ишлаб чиқариш йўлга қўйилди. Бу борада хорижий инвесторларнинг қўллаб-қувватланиши соҳадаги натижалар самарасини оширмоқда.
“Indorama Corporation” Ўзбекистон пахта ва тўқимачилик саноати ривожи йўлида катта инвестиция киритган Сингапур компанияси ҳисобланади.
Президент Шавкат Мирзиёев раислигида 2 июнь куни кимё саноатини жадал ривожлантириш ва ҳудудларда инвестиция лойиҳаларини амалга ошириш бўйича вазифалар юзасидан видеоселектор йиғилиши бўлиб ўтди.
Мазкур йиғилишда иштирок этган “Indorama Corparation” компанияси ижрочи директори Пракаш Кежривал давлатимиз раҳбарига Ўзбекистонда олиб бораётган фаолияти, инвесторларга берилаётган имкониятлар хусусида фикрларини билдирди. Шу билан бирга, компания фаолиятини юритишда янада муҳим бўлган масалалар юзасидан қўллаб-қувватлашини сўради.
Президент Шавкат Мирзиёев инвесторнинг фаолиятини кенгайтириш учун қандай кўмак лозим бўлса, албатта, берилиши юзасидан масъулларга топшириқлар берди.
Маълумот сифатида айтиш мумкинки, “Indorama” Ўзбекистон тўқимачилик саноатида йирик инвесторлардан бири ҳисобланади. Бунда нафақат тўқимачилик, балки агробизнесга ҳам сезиларли инвестиция киритган. Шу билан бир қаторда, “Indorama” ўғитларни ишлаб чиқариш бизнесини Ўзбекистонда ривожлантирмоқда.
“Indorama Corparation” компанияси ижрочи директори Пракаш Кежривал давлатимиз раҳбарининг қўллаб-қувватлашидан бениҳоя мамнун эканини таъкидлади.
– 2010 йилдан буён Ўзбекистонга инвестиция киритиб, фаолият юритиб келмоқдамиз. Бизнинг инвестицияларимиз асосан кимё саноати, аграр соҳадаги қўшма лойиҳалар ҳамда кўчмас мулкни ривожлантириш йўналишларини қамраб олган. Президентингиз, инвесторлар ва бошқа манфаатдор томонлар иштирокидаги учрашув жуда самарали бўлди. Бу каби мулоқотлар биз каби инвесторларга ўз муаммоларини очиқ баён қилиш ва уларнинг қисқа ҳамда аниқ белгиланган муддатларда ҳал этилишига эришиш имконини беради. Бу жуда фаол ва илғор ёндашувдир. Айни мулоқотлар нафақат инвесторларнинг ишончини янада мустаҳкамлайди, балки мамлакатнинг олий раҳбарияти инвесторлар муаммоларини тинглаш, уларни кўриб чиқиш ва қониқтирадиган тарзда ҳал этишга эътибор қаратаётганини намоён қилади. Бу эса биз каби хорижлик тадбиркорлар ишончи билан бирга, Ўзбекистонда фаровон фаолият юритишимиз учун хотиржамлигимизни янада оширади.
<iframe width="560" height="315" src="https://www.youtube.com/embed/xMQZ1-M3viU?si=-CgLbZjrtLGjI-Bg" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Абдулазиз РУСТАМОВ,
Ёқубжон МЕЛИБОЕВ (видео), ЎзА
