Осиё ўйинларида муваффақиятга эришган спортчилар Тошкентда(+видео)
ХХ ёзги Осиё ўйинларида муваффақиятли иштирок этаётган Ўзбекистон спорт делегациясининг биринчи гуруҳи, яъни енгил атлетика, ўқ отиш, оғир атлетика спорт тури бўйича миллий терма жамоа аъзолари куни кеча пойтахт аэропортида тантанали кутиб олинди.
Кутиб олиш маросимида иштирок этган Ўзбекистон Республикаси Спорт вазирлиги, Мудофаа вазирлиги ҳамда тегишли федерация мутасаддилари, мутахассислари, спортчиларнинг ота-оналари, яқинлари, кенг жамоатчилик вакиллари бу йилги Осиё ўйинлари юртимиз спортчилари учун ҳар қачонгидан ҳам мураккаб кечаётган бўлса-да, оловқалб ёшларимиз юксак ғалабаларни қўлга киритаётгани таҳсинга сазовор эканини таъкидлашди.
Хусусан, оғир атлетикачимиз Акбар Жўраев чемпионлик шоҳсупасига кўтарилиш билан бирга жаҳон рекордини ўрнатгани, Шарифа Давронова, Сухроб Хўжаев, Барнохон Сайфуллаева каби енгил атлетикачиларимизнинг Осиё ўйинлари ғолиблигига эришгани мамлакатимиз спорти нуфузини юксалтиришга муносиб ҳисса қўшиш баробарида мухлисларга катта қувонч ва фахр бағишлади.
Айтиш лозимки, Осиё ўйинларининг ортда қолган ўн биринчи мусобақалар кунига қадар Ўзбекистон спортчилари 16 та олтин, 19 та кумуш, 19 та бронза медали билан 45 га яқин мамлакат орасида 4-ўринни банд этиб турибди.
Эслатиб ўтамиз, ХХ ёзги Осиё ўйинлари 4 октябрга қадар давом этади.
<iframe width="830" height="467" src="https://www.youtube.com/embed/fF3yzGv3fR8" title="Osiyo o`yinlarida muvaffaqiyatga erishganlar Toshkentda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Т.Рўзиев,
Ё.Мелибоев (видео), ЎзА
