Осиё чемпионати: волейболчи қизларимиз Мўғулистон билан куч синашади
Таиландда волейбол бўйича U18 аёллар жамоалари ўртасида ўтказилаётган Осиё чемпионатининг илк баҳси Ўзбекистон терма жамоаси учун тажриба орттириш майдони бўлди.
Кеча Ўзбекистон терма жамоаси гуруҳ босқичидаги илк учрашувини Австралия жамоасига қарши ўтказди.
Мураккаб кечган баҳсда ҳамюртларимиз нафақат Осиё-Океания минтақасининг, балки дунёнинг энг кучли жамоаларидан бири саналган Австралия жамоасига 17:25, 22:25, 19:25 кўринишида ўйинни бой берди.
Айтиш лозим, чемпионатда умумий ҳисобда 16 та жамоа 4 та гуруҳга бўлинган ҳолда куч синашади.
Ўзбекистон терма жамоаси Таиланд, Австралия, Мўғулистон билан “А” гуруҳидан жой олган.
Кеча шунингдек, “А” гуруҳида Таиланд-Мўғулистон жамоалари ўртасидаги учрашувда мезбонлар 25-15, 25-13, 25-19 ҳисобида устунликка эришди.
Бугун, 2 июль куни чемпионатнинг навбатдаги даврасида Ўзбекистон жамоаси Мўғулистон билан, Таиланд Австралия билан куч синашади.
Эслатиб ўтамиз, 7 июлга қадар давом этадиган чемпионатда энг яхши натижага эришган 4 та терма жамоа 2027 йили U19 қизлар жамоалари ўртасида ўтказилиши режалаштирилган жаҳон чемпионати йўлланмасига эга чиқади.
Т. Рўзиев, ЎзА
