Норасмий сектор томонидан 23,2 триллион сўмлик қурилиш ишлари бажарилган
Ўзбекистонда қурилиш соҳаси юқори суръатларда ривожланишда давом этмоқда. Шу билан бирга, тармоқда норасмий секторнинг улуши ҳам сезиларли даражада сақланиб қолмоқда.
Миллий статистика қўмитаси маълумотларига кўра, 2026 йилнинг январь–апрель ойларида мамлакатда норасмий сектор томонидан 23,2 триллион сўмлик қурилиш ишлари бажарилган. Бу кўрсаткич ўтган йилнинг мос даврига нисбатан 14,4 фоизга ошган.
Таҳлилларга кўра, норасмий сектор ҳиссасига тўғри келган қурилиш ишлари мамлакат бўйича амалга оширилган умумий қурилиш ҳажмининг 27,5 фоизини, яъни қарийб учдан бир қисмини ташкил этган. Бу эса соҳада норасмий меҳнат ва хизматлардан фойдаланиш ҳали ҳам юқори даражада сақланиб қолаётганини кўрсатади.
Ҳисоботда қайд этилишича, қурилиш ишларининг асосий қисми кичик бизнес субъектлари ҳиссасига тўғри келган. Жумладан, кичик корхона ва микрофирмалар томонидан 39,6 триллион сўмлик қурилиш ишлари бажарилган бўлиб, бу умумий ҳажмнинг 46,9 фоизини ташкил этган.
Мутахассислар фикрича, қурилиш соҳасидаги фаолликнинг ортиши янги турар жойлар, ижтимоий объектлар ва инфратузилма лойиҳалари сони кўпайиб бораётгани билан боғлиқ. Шу билан бирга, норасмий сектор улушининг юқорилиги меҳнат муносабатларини расмийлаштириш ва соҳада шаффофликни ошириш бўйича ишларни янада кучайтириш зарурлигини кўрсатмоқда.
Шаҳноза Маматуропова,
ЎзА
