Марказий банк мурожаатлар бўйича энг салбий кўрсаткичга эга 10 та банкни эълон қилди
Марказий банк 2026 йилнинг II чораги якунлари бўйича банклар фаолияти юзасидан келиб тушган мурожаатлар таҳлили ва «мурожаатлар индекси» натижаларини эълон қилди.
Унга кўра, апрель–июнь ойларида Марказий банкка тўғридан-тўғри ҳамда бошқа давлат органлари орқали банклар фаолияти юзасидан 11 331 та мурожаат келиб тушган.
Таҳлилга кўра, биринчи чоракдаги «ТОП-10» таркибидан етти банк ўз ўрнини сақлаб қолган. Davr Bank, Tenge Bank ва Агробанк рўйхатдан чиқиб, уларнинг ўрнини Infinbank, Ипотека-банк ва Капиталбанк эгаллаган. II чоракда индекс бўйича энг катта ўзгариш AVO Bankда кузатилган. Банкнинг кўрсаткичи биринчи чоракдаги 2,16 дан 4,42 гача ошиб, қарийб 2,05 баробарга кўтарилган. Шу тариқа, AVO Bank «ўнталик»даги энг юқори индексни қайд этган.
TBC Bankда индекс 2,06 дан 2,63 гача ошиб, банк бешинчи ўриндан тўртинчи ўринга кўтарилган. Turonbankда кўрсаткич 1,25 дан 1,46 гача, Asakabankда эса 1,26 дан 1,28 гача ошган.
Айни пайтда айрим банкларда ижобий динамика қайд этилган. Anor Bankда индекс 3,29 дан 1,84 гача, Бизнесни ривожлантириш банкида 3,34 дан 2,78 гача, Микрокредитбанкда эса 3,23 дан 2,69 гача пасайган. Умуман, II чоракда «ТОП-10» банкларнинг ўртача «мурожаатлар индекси» 2,14 дан 2,07 гача пасайган.
Марказий банкнинг тушунтиришича, индекс банкнинг мурожаатлар сони бўйича бозор улуши ҳамда мижозлар сони бўйича бозор улуши нисбати асосида ҳисобланади. Кўрсаткич қанча юқори бўлса, банкнинг мижозлар базасига нисбатан шунча кўп мурожаат келиб тушганини англатади. Шу билан бирга, «мурожаатлар индекси» банкнинг молиявий барқарорлиги ёки ишончлилигини баҳоламайди. У мижозлар сонига нисбатан мурожаатлар улушини акс эттирувчи статистик кўрсаткич ҳисобланади.
Чорак давомида 100 тадан кам мурожаат келиб тушган банклар бўйича индекс ҳисобланмайди. Марказий банк банкларга мурожаатларнинг сабабларини чуқур таҳлил қилиш, уларни кўриб чиқиш жараёнларини такомиллаштириш ва истеъмолчилар ҳуқуқларини ҳимоя қилиш чораларини кучайтиришни тавсия этган.
Янги ёндашувга кўра, банклар келиб тушган шикоятни ҳал қилиш билан чекланиб қолмасдан, унинг келиб чиқиш сабабини аниқлаши ва бартараф этиши лозим. Зеро, мурожаатлар нафақат муаммони кўрсатувчи кўрсаткич, балки банк хизматлари сифатини яхшилаш ва мижозлар ишончини мустаҳкамлаш учун муҳим «қайта алоқа» воситаси ҳамдир.
Ш.Маматуропова, ЎзА
