Ko‘p yillik samarali mehnat faoliyati munosib taqdirlandi

Inson umrining qadri uning necha yil yashagani bilan emas, balki ortda qoldirgan ezgu ishlari, el-yurt ravnaqiga qo‘shgan hissasi va odamlar qalbida qoldirgan yaxshi nomi bilan o‘lchanadi. Ayniqsa, butun umrini ta’lim-tarbiya, jamoat ishlari va xalq xizmatiga bag‘ishlagan insonlarning hayot yo‘li bir avlod uchun emas, keyingi avlodlar uchun ham ibrat maktabi bo‘lib xizmat qiladi.

Buxoro viloyati cho‘lquvarlar yurti Qorovulbozor tumanida ana shunday sharafli va sermazmun umr yo‘lini bosib o‘tayotgan insonlardan biri — Sayfullo Toshev. Qariyb yarim asr davomida ta’lim va boshqaruv tizimida samarali mehnat qilgan, o‘zining fidoyiligi, mas’uliyati va odamlar bilan samimiy munosabati bilan el hurmatini qozongan ustozning mehnatlari yana bir bor munosib e’tirof etildi.

Davlatimizda inson qadrini ulug‘lash, keksa avlod vakillarining ko‘p yillik mehnatini munosib baholash, ularning hayotiy tajribasidan yoshlar tarbiyasida samarali foydalanishga alohida e’tibor qaratilmoqda. Prezidentimiz tashabbusi bilan nuroniylarni e’zozlash, ularning jamiyatdagi mavqei va faolligini yanada oshirish, keksa avlod vakillarining hayotiy tajribasini yosh avlodga yetkazish borasida amalga oshirilayotgan ishlar bugun o‘zining amaliy ifodasini topmoqda. Sayfullo Toshevning hayot yo‘li ham ana shu yuksak e’tiborning munosib namunasidir.

Ustozning ko‘p yillik samarali mehnat faoliyati, ta’lim tizimi va jamoat ishlaridagi xizmatlari inobatga olinib, u “I darajali Mehnat faxriysi” ko‘krak nishoni bilan taqdirlangan edi. Bugun esa ushbu yuksak e’tirof sharafiga Sayfullo Toshevning xonadoni darvozasiga ramziy peshlavha o‘rnatildi.

Bu oddiy bir peshlavha emas. Unda bir insonning qariyb yarim asrlik halol mehnati, kasbiga sadoqati, el xizmatiga bag‘ishlangan umri va munosib hayot yo‘li mujassam. Endi bu xonadondan o‘tar ekan, har bir kishi ana shu insonning hayotiga nazar tashlab, mehnat bilan topilgan obro‘ va hurmatning qanchalar ulug‘ qadriyat ekanini anglaydi.

Tantanali tadbirda tuman hokimi O‘tkir Hamroyev, nuroniylar, mahalla faollari va keng jamoatchilik vakillari ishtirok etishdi.

Tadbirda so‘zga chiqqan tuman hokimi ustozning ko‘p yillik samarali mehnat faoliyati, ta’lim va boshqaruv sohasidagi xizmatlari, yosh avlod tarbiyasiga qo‘shgan hissasi hamda mahalla hayotidagi faol ishtirokini alohida ta’kidladi. Sayfullo Toshevning bugungi kunda ham mahallada faol bo‘lib, yoshlarga o‘zining boy hayotiy tajribasi bilan o‘rnak ko‘rsatayotgani e’tirof etildi.

Sayfullo Toshev 1955-yilda Kogon tumanida tavallud topgan. 1977-yilda Qorovulbozor tumaniga yo‘l olgan yosh mutaxassis bu maskan uning hayotida shunchalar muhim o‘rin tutishini, taqdir uni ushbu zamin bilan uzoq yillarga bog‘lashini o‘sha paytda, ehtimol, tasavvur ham qilmagan. Ammo hayot yo‘llari uni Qorovulbozor bilan chambarchas bog‘ladi.

Yosh mutaxassis mehnat faoliyatini fizika fani o‘qituvchisi sifatida boshladi. O‘quvchilarga fan sirlarini o‘rgatar ekan, ular qalbiga ilmga qiziqish, izlanish va maqsad sari intilish tuyg‘ularini ham singdirdi. Uning kasbga bo‘lgan sadoqati, tashkilotchilik qobiliyati va odamlar bilan ishlash mahorati keyinchalik uni mas’uliyatli lavozimlarga yetakladi.

U yillar davomida maktab direktori, xalq ta’limi bo‘limi mudiri kabi mas’uliyatli vazifalarda faoliyat yuritdi. Keyinchalik mahalla raisi sifatida ham aholi manfaatlarini himoya qilish, hududda osoyishtalik va hamjihatlikni ta’minlash, yoshlarni to‘g‘ri yo‘lga yo‘naltirish, oilalar bilan ishlash kabi muhim vazifalarga munosib hissa qo‘shdi. Shu tariqa uning hayot yo‘li oddiy mehnat faoliyatidan iborat bo‘lib qolmadi. Ustoz uchun har bir lavozim, avvalo, odamlarga xizmat qilish imkoniyati bo‘ldi.

Bugun 70 yoshdan oshgan Sayfullo Toshev “Tinchlik” mahallasining hurmatli va faol nuroniylaridan biri sifatida e’tirof etiladi. Uning uchun nafaqa — faol hayotdan chetga chiqish degani emas. Aksincha, yillar davomida orttirilgan tajriba bugun jamiyat uchun yana bir katta boylikka aylangan.

Kechagi o‘qituvchi, maktab rahbari, ta’lim tizimi mutasaddisi va mahalla raisi bugun yoshlar bilan suhbatlarda, mahalla hayotida, jamoat ishlarida o‘zining hayotiy tajribasi bilan ishtirok etmoqda. Chunki yillar davomida orttirilgan tajriba, ko‘rilgan hayot saboqlari va odamlar bilan ishlash madaniyati — katta avlodning yoshlarga qoldiradigan eng qimmatli merosidir.

Sayfullo Toshev oilada ham ibratli hayot kechirdi. Turmush o‘rtog‘i bilan birga to‘rt nafar farzandni tarbiyalab, ularni el-yurtga naf keltiradigan, halol mehnat va ezgulikni hayot mezoni deb biladigan insonlar etib voyaga yetkazdi. Aslida, farzand tarbiyasi ham bir umrlik mehnat. Uning samarasi esa yillar o‘tib, farzandlarning kamoli, jamiyatdagi o‘rni va elga qilayotgan xizmatida namoyon bo‘ladi.

Xonadoni darvozasiga o‘rnatilgan ramziy peshlavha Sayfullo Toshevning shaxsiy yutug‘inigina ifodalamaydi. U mehnatni qadrlash, ustozni ulug‘lash, keksalarga hurmat va inson qadrini yuksaltirish kabi azaliy qadriyatlarning ramzidir. Bugun uni ko‘rgan yosh avlod vakillari “Inson o‘zidan keyin nima qoldiradi?” degan savol haqida o‘ylashi tabiiy.

Sayfullo Toshevning qariyb yarim asrlik mehnat yo‘li ana shu haqiqatni yana bir bor tasdiqlaydi. Ustozning hayotidagi har bir bosqich — ta’limdagi fidoyilik, boshqaruvdagi mas’uliyat, mahalladagi jonbozlik, oiladagi matonat va bugungi nuroniylik — bir-biriga uyg‘un holda bitilgan ibratli umr sahifalaridir.

Eng muhimi, bugun e’zozlanayotgan ustozning hayot yo‘li yoshlarga bir haqiqatni uqtiradi: mehnat bilan topilgan obro‘ yillar o‘tgan sari qadrsizlanmaydi, aksincha, tobora yuksalib boradi. Shu ma’noda, Qorovulbozordagi ushbu ramziy peshlavha bir insonning sharafli mehnat yo‘liga qo‘yilgan e’zoz belgisi bo‘lish bilan birga, butun jamiyatga qarata aytilgan ezgu da’vat hamdir: insonni qadrlang, ustozni ulug‘lang, nuroniyni e’zozlang, mehnatni sharaflang. Zero, bugungi yuksak e’tirof — ertangi avlod uchun ibratdir.

Zarif Komilov, O‘zA muxbiri