Хитой Арктика орқали Европага мунтазам контейнер йўналишини ишга туширди
ХХРнинг “Sea Legend” юк ташиш компанияси Шимолий денгиз йўналиши орқали Хитой ва Европа ўртасида мунтазам контейнер хизматини йўлга қўйди. Ушбу йўналиш Нинбо-Чжоушань портини Буюк Британиянинг Феликстоу шаҳри билан боғлайди ва юкларни тахминан 20 кун ичида етказиб бериш имконини беради.
Бу галги ташув 2025 йилда синов сафаридан сўнг амалга оширилди, ўшанда “Sea Legend” контейнер кемаси биринчи марта Хитойдан Буюк Британияга Арктика орқали 20 кун ичида сузиб ўтган эди. Жорий йилда компания саккизта саёҳатни режалаштирмоқда.
Бироқ Шимолий денгиз йўналиши ҳали анъанавий савдо йўлларининг тўлиқ ўрнини боса олмайди. Навигация муз шароитлари ва об-ҳавога боғлиқ, кемалар эса махсус тайёргарликдан ўтиши керак.
Арктикада қутқарув амалиётлари учун инфратузилма ҳам чекланганлигича қолмоқда. Қолаверса, юқори суғурта харажатлари ва йўналишнинг Россия қирғоқлари бўйлаб ўтиши билан боғлиқ геосиёсий хавфлар ҳам қўшимча тўсиқлар туғдиради.
С.Раҳимов, ЎзА
