G‘ijduvon — mustaqillik shukuhi og‘ushida
Mustaqilligimizning 35 yillik shodiyonasi tobora yaqinlashar ekan, yurtimizning har bir go‘shasida bayram nafasi, yangilanish va bunyodkorlik ruhi tobora yaqqol namoyon bo‘lmoqda. Bu ulug‘ sanaga tayyorgarlik jarayoni Buxoro viloyatining tadbirkorlar yurti G‘ijduvon tumanida ham ko‘tarinki kayfiyat va katta mas’uliyat bilan davom etmoqda.
Zero, “Yagona Vatan, yagona xalq bo‘lib, yangi hayot va kelajak yaratamiz!” degan ezgu g‘oya tumandagi bugungi bunyodkorlik ishlarining mazmun-mohiyatini to‘la ifoda etadi.
Davlat rahbari tashabbusi bilan yurtimizda mahallalarni obod qilish, aholi uchun munosib turmush sharoitini yaratish, shahar va qishloqlar qiyofasini zamonaviylashtirish, inson qadrini ulug‘lashga qaratilgan ezgu ishlar G‘ijduvonda ham izchil davom etmoqda.
Ayni kunlarda tuman ko‘chalari, mahallalar, korxona va tashkilotlar hududlarida keng ko‘lamli obodonlashtirish ishlari olib borilmoqda. Ko‘chalar tartibga keltirilib, hududlar yanada ko‘rkamlashtirilmoqda. Tungi yoritish chiroqlari o‘rnatilib, davlat bayroqlari, rang-barang bannerlar va bayramona shiorlar bilan bezatilayotgan ko‘chalarga o‘zgacha fayz kirmoqda.
Ayniqsa, kechki payt G‘ijduvon ko‘chalaridagi yorug‘liklar, xilpirayotgan bayroqlar va bayramona bezaklar tumanga alohida ko‘rk bag‘ishlaydi. Go‘yoki har bir ko‘cha, har bir mahalla Mustaqillikning 35 yillik to‘yini qarshi olish uchun o‘z libosini yangilayotgandek.
Obodlik — xalq kayfiyati. Obodlik — insonga bo‘lgan e’tibor. Obodlik — yurtga bo‘lgan mehrning amaliy ifodasidir.
Shu ma’noda, bugun G‘ijduvonda amalga oshirilayotgan har bir ezgu ish zamirida inson qadrini yuksaltirish, mahallalarni yanada obod va farovon maskanlarga aylantirish, odamlarga munosib sharoit yaratishdek ulug‘ maqsad mujassam.
Mustaqillik bizga nafaqat erkin va farovon hayot qurish imkonini, balki o‘z taqdirimiz va kelajagimizni o‘z qo‘limiz bilan bunyod etish mas’uliyatini ham berdi. Bugungi obod mahallalar, ravon ko‘chalar, zamonaviy inshootlar va yangilanib borayotgan hududlar ana shu imkoniyatlarning hayotdagi ifodasidir.
G‘ijduvon ham ana shu buyuk yangilanishlar jarayonidan munosib o‘rin egallab, yildan-yilga o‘zining yangi qiyofasini namoyon etmoqda. Bir tomonda tarixiy an’analar, bir tomonda zamonaviy taraqqiyot — bu ikki uyg‘unlik tumanning betakror qiyofasini yaratmoqda.
Eng muhimi, Mustaqillik bayrami oldidangi bu bunyodkorlik ishlari odamlarda ertangi kunga ishonch va yurt taqdiriga daxldorlik tuyg‘ularini yanada kuchaytirmoqda.
Chunki bugun G‘ijduvonda faqat ko‘chalar emas, ko‘ngillar ham obod bo‘lmoqda.
Mustaqillikning 35 yilligi — G‘ijduvon uchun shunchaki sana emas. Bu — bosib o‘tilgan sharafli yo‘l, bugungi obod hayot va ertangi buyuk maqsadlarga nazar tashlash fursati.
Yagona Vatan, yagona xalq bo‘lib, yangi hayot va kelajak yaratamiz!
Zarif Komilov, O‘zA muxbiri
