Германия ва яна 5 давлат ЕИ бюджетини қисқартириш тарафдори
“Financial Times” нашри хабар беришича, Германия, Австрия, Дания, Нидерландия, Финляндия ва Швеция раҳбарлари Брюсселга расмий хат йўллаб, 2028-2034 йилларга мўлжалланган Европа Иттифоқи харажатини юзлаб миллиард еврога қисқартириш талаби билан чиққан.
– Европа Иттифоқи бюджети туб ислоҳотга муҳтож, аниқ танлов қилишимиз керак, – дейилган олти давлат раҳбари имзолаган мурожаатда.
Германия Канцлери Фридрих Мерц ва унинг беш ҳамкасби сарф аҳамиятли даражада қисқартирилмагунча, кейинги етти йиллик бюджет лойиҳаси тасдиқланмаслигини очиқ маълум қилди. Ушбу талаб ЕИ аъзолари ўртасида келгуси устувор йўналишлар бўйича жиддий келишмовчилик мавжудлигини кўрсатади.
Бир томондан мудофаани мустаҳкамлаш ҳамда АҚШ ва Хитой билан рақобатда қийинчиликка дуч келаётган саноат соҳаларини қўллаб-кувватлаш учун янги маблағ талаб этилмоқда. Иккинчи томондан анъанавий равишда бюджетнинг асосий қисми йўналтириладиган фермерлар ва кам ривожланган минтақалар молиялаштирилишини давом эттириш зарурати сақланиб қолмоқда.
Ҳужжатни имзолаган 6 етакчи давлат мавжуд ресурсларни асосан мудофаа соҳаси ва инновацион компанияларни қўллаб-қувватлашга қаратиш таклифини киритган. Ҳамкорлар фикрича, кучайиб бораётган иқтисодий қийинчилик ва хавфсизлик таҳдидига фақат шу йўл билан муносиб жавоб бериш мумкин.
2028-2034 йилларга мўлжалланган ЕИ бюджети кучга кириши учун ташкилотга аъзо барча 27 та давлат бир овоздан рози бўлиши шарт. 6 мамлакат эътирози етакчиларнинг йил охиригача келишувга эришиш ваъдасини хавф остига қўйган.
“Financial Times” таҳлилчилари таъкидлашича, Франция, Италия, Испания ва Польшада кутилаётган сайлов жараёни музокарани янада мураккаблаштириши мумкин.
Ф.Яхшибоева, ЎзА
