Газ хавфсизлиги аввало инсон ҳаётига дахлдордир
Қишнинг совуқ кунларида хонадондаги бир бурчакдан таралаётган илиқлик инсон учун оддий қулайликдек туюлади. Аммо ана шу илиқлик ортида қанчадан-қанча масъулият, меҳнат ва энг муҳими, инсон ҳаёти хавфсизлиги учун жавобгарлик мужассам. Табиий газ — турмушимизда энг зарур неъматлардан бири. Бироқ ундан фойдаланишда хавфсизлик талабларига қатъий риоя қилиш, газ тармоқларини мавсумга пухта тайёрлаш ҳар қачонгидан ҳам муҳим.
Бугун мамлакатимизда аҳолига сифатли ва хавфсиз коммунал хизмат кўрсатиш, энергетика тармоқларини модернизация қилиш, истеъмолчилар учун муносиб шароит яратишга давлат сиёсати даражасида алоҳида эътибор қаратилмоқда. Президентимиз ташаббуслари асосида газ таъминоти тизимида инфратузилмани янгилаш, эскирган тармоқларни босқичма-босқич реконструкция қилиш, аварияларнинг олдини олиш ва аҳолига газни барқарор ҳамда хавфсиз етказиб бериш борасида кенг кўламли ишлар амалга оширилмоқда.
Бу эзгу мақсадлар Бухоро вилоятининг Когон шаҳри ва Когон туманида ҳам изчил амалий ишлар билан уйғунлашмоқда.
“Когонтумангаз” газ таъминоти бўлими томонидан куз-қиш мавсумини беталафот ўтказиш, мавжуд газ тармоқларининг техник ҳолатини яхшилаш ва истеъмолчилар хавфсизлигини таъминлаш мақсадида кенг кўламли тайёргарлик ишлари олиб борилмоқда. Бу жараённи рақамлар билан ифодалайдиган бўлсак, бугунга қадар қарийб 2 километр газ қувури мукаммал таъмирланди. Яна 10 километр газ тармоғида ташқи кўринишини тартибга келтириш ва эстетик ҳолатини яхшилаш ишлари амалга оширилди. Эътиборли жиҳати шундаки, ишларнинг асосий қисми кўзга кўринадиган таъмирлаш билан чекланиб қолмаяпти. Мутахассислар тармоқларнинг ер остидаги ҳолатига ҳам жиддий эътибор қаратмоқда. Хусусан, 77 километр ер ости газ қувурининг техник ҳолати текширилди. Бу оддий рақам эмас. Чунки ер остидаги ҳар бир метр қувур ортида минглаб хонадонларнинг осойишталиги, корхона ва ташкилотларнинг барқарор фаолияти, энг муҳими, инсонлар ҳаёти ва саломатлиги турибди.
Мавсумни муаммосиз ўтказишда газ тармоқларидаги босимни меъёрда ушлаб туриш, газ маромлаш қурилмаларининг соз ҳолатда бўлиши муҳим аҳамият касб этади. Шу мақсадда 3 та газ маромлаш қурилмаси янгиланди, 450 дан ортиқ қурилма тафтишдан ўтказилди. Шунингдек, қарийб 3 минг нафар истеъмолчининг табиий газ таъминоти икки босқичли тизимга ўтказилди. Мутахассисларнинг таъкидлашича, бундай ишлар биринчи навбатда газ таъминоти барқарорлигини ошириш, босимдаги кескин ўзгаришларнинг олдини олиш ва истеъмолчиларга табиий газни янада хавфсиз етказиб бериш имконини беради.
“Когонтумангаз” газ таъминоти бўлими бош муҳандиси Саъдулло Шодиевнинг таъкидлашича, мавсумга тайёргарлик бир кунлик ёки мавсумий тадбир эмас, балки тизимли ва узлуксиз жараёндир.
— Бугунги кунда асосий мақсадимиз — истеъмолчиларни табиий газ билан узлуксиз таъминлаш баробарида, унинг хавфсиз етказиб берилишини кафолатлаш. Шунинг учун ҳар бир газ қувури, ҳар бир газ маромлаш қурилмаси ва ҳар бир тармоқни жиддий назоратдан ўтказяпмиз. Қарийб 2 километр газ қувурининг мукаммал таъмирлангани, 77 километр ер ости тармоқларининг текширилгани, 450 дан ортиқ газ маромлаш қурилмаси тафтишдан ўтказилгани — ана шу масъулиятнинг амалий ифодасидир, — дейди Саъдулло Шодиев. Бош муҳандиснинг қайд этишича, ишларнинг ҳар бир босқичида хавфсизлик биринчи ўринда турибди.
— Газ таъминотида “майда иш” деган тушунча бўлмаслиги керак. Бир қарашда арзимасдек кўринган носозлик ҳам кейинчалик жиддий муаммога айланиши мумкин. Шу боис тармоқларни мавсумга тайёрлашда ҳар бир участка, ҳар бир қурилма ва ҳар бир истеъмолчигача бўлган тизим алоҳида эътибор билан кўриб чиқилмоқда. Мақсадимиз — қиш мавсумини нафақат барқарор, балки хавфсиз ўтказиш, — дейди у.
Амалга оширилаётган ишлар якунига етгач, Когон шаҳридаги қарийб 9 минг, Когон туманидаги 5 мингдан ортиқ истеъмолчининг табиий газ таъминоти янада яхшиланиши кутилмоқда. Бу — ўн минглаб инсонларнинг хонадонларида қишнинг совуқ кунларини хотиржам ўтказиши учун яратилаётган муҳим шароитдир. Бироқ бу ерда масаланинг яна бир муҳим жиҳати бор. Газ таъминотида хавфсизлик фақат таъминотчи ташкилотнинг вазифаси эмас. Ҳар бир хонадон эгаси ҳам газ жиҳозларидан тўғри фойдаланиши, уларни ўзбошимчалик билан таъмирламаслиги, мўри ва шамоллатиш тизимларини мунтазам текшириб туриши лозим. Чунки мукаммал таъмирланган қувур ҳам, замонавий газ қурилмаси ҳам ундан нотўғри фойдаланилса, хавф манбаига айланиши мумкин. Кўпинча инсон уйидаги газ плитасини ёққанда ёки иссиқ хонада бемалол ўтирганда бу қулайлик ортида турган катта меҳнатни сезмайди. Аммо қиш мавсуми олдидан кечаю кундуз ишлаётган мутахассислар учун ҳар бир километр газ қувури, ҳар бир қурилма ва ҳар бир хонадон — алоҳида масъулият. Когон шаҳри ва туманида олиб борилаётган ишлар ҳам ана шу масъулиятнинг ёрқин намунасидир.
Қарийб 2 километр қувур таъмирланмоқда. 77 километр ер ости тармоғи текширилмоқда. Юзлаб қурилмалар тафтишдан ўтказилмоқда. Минглаб истеъмолчиларнинг таъминоти янги, янада ишончли тизимга ўтказилмоқда. Зеро, рақамлар — шунчаки статистика эмас. Уларнинг ҳар бири ортида инсон бор. Ҳар бир таъмирланган қувур — бир оиланинг хотиржамлиги, ҳар бир текширилган қурилма — бир хонадоннинг хавфсизлиги, ҳар бир янгиланган тармоқ эса эртанги кунга ишонч демакдир. Шу маънода, газ хавфсизлиги — бу фақат техник вазифа эмас. Бу инсон ҳаётига, унинг осойишталиги ва фаровонлигига бўлган юксак масъулиятдир. Когонда бу масъулиятни ҳис қилган ҳолда олиб борилаётган ишлар эса қиш фаслини ҳар бир хонадон учун илиқ, осуда ва энг муҳими, хавфсиз ўтказишга хизмат қилади.
Зариф Комилов, ЎзА мухбири
